Parlamentario Hendrik Tevreden:
ORANJESTAD(AAN)— Hendrik Tevreden, parlamentario di fraccion di MEP, a reitera cu den Partido FUTURO tin dos “high way” di pensamento, y si por nota bon por mira cu señor Geoffrey Wever, cu na comienzo di FUTURO a bisa cu nan ta un partido di dos cabes, y tin dos lider, por mira cu e ta wordo laga for di tur e papelnan di formacion, tur e recepcionnan y dialogonan cu gremionan, cu e no ta den ningun di nan.
“Mi no sa cu esey ta un señal di problema di FUTURO, na salida caba, sinembargo nos ta keda monitor esaki sigur pasobra cu nos ta mira cu den reunionnan di Parlamento mes, pero publicamente tambe den e parti di formacion señor Wever no ta presente di ningun manera. Siendo cu di otro banda, Wendrick si de vez en cuando ta compaña señor Eman den e dialogo cu tin cu gremionan, etc.
En todo caso, Tevreden a subraya cu fraccion di MEP ta keda riba e alerta y keda presiona riba presidente di Parlamento pa yama e reunion di presupuesto, pasobra MEP ta kere cu e reunion aki ta hopi importante, no solamente pa Gobierno, pero pa continuidad di tur e dienstnan y fundacionnan cu ta mara na dje, pero tambe pa pueblo keda den standing pa locual ta finanzas publico, p’asina evita cu tin problema cu Rijksministerraad cu ta exigi pa e presupuesto ta trata na tempo.
“Pues, si bo a tuma bon nota, Gabinete Wever-Croes a zorg pa tres surplus, tres presupuesto entrega na tempo, trata na tempo y cu surplus, y lo ta un lastima aworaki pa mira cu nos ta bay trata presupuesto laat, apesar cu tin surplus pa falta di experiencia y madurez politico, y falta di por lidera di parti di Presidente di Parlamento Croes, pa por yama un reunion cu practicamente presupuesto ta full cla, y tur e reunionnan y conseho a wordo duna riba dje. “Pues practicamente ta djis un fecha mester wordo poni pa por trat’e”, Parlamentario Hendrick Tevreden a reitera.
