Ir.Edwin Jacobs, director AZV:
ORANJESTAD (AAN)-- Ir. Edwin Jacobs, director di AZV a reitera cu tin un ampliacion di dokternan di cas, cu un mas na caminda, y e fortificacion di e trabao di dokter di cas cu e POHnan.
“E POHnan tin cu bay kita hopi trabao di e dokternan di cas, cu ta trabaonan rutinario di clientenan, cu ta ripiti por lo general, pa baha e presion cerca e dokter di cas mande cerca e POH.
Despues di un par di aña cu e cantidad di aseguradonan no a crece, nos ta ripara cu aña pasa nos tin mas of menos 2000-2200 asegurado cu a bin acerca.
Den cuadro di e personanan cu a haya permiso den e programa di flexibilizacion, pa nan yega cerca nos nan tin cu yega prome na Censo. Eynan tin un proceso cu no tin e capacidad pa atende cu tanto persona asina y nos ta ricibi esey tambe cerca nos. Por bien ta cu DIMAS a duna 4.000 permiso, pero locual a wordo procesa na Censo ta yega bek cerca nos”, Ir. Jacobs a señala.
Señor Jacobs no ta kere cu pa e aña aki nan lo haya e impacto grandi aki. El a señala cu tin cu wak unda ta e cantidad di pashent ta bahando cerca dokter di cas, y esey ta aumenta espacio un poco, y AZV ta keda busca solucionnan, pasobra nan ta conciente di esaki.
El a subraya si cu e prome linea di cuido mester ta fuerte. Ademas a moderniza e contrato di trabao cu e dokternan di cas, antes 90% tabata un suma fiho, awo 60% ta un suma fiho y e resto ta variable loke ta depende di cuanto consulta e dokter tin, loke ta stimul’e pa mira mas pashent.
“Constantemente nos ta monitorea esaki, y nos ta expect cu e grupo cu ta participa den e programa di flexibilizacion, ta un grupo cu tey caba y cu lo por tin un retraso den cuido, anto asina nan drenta e seguro, lo purba un manera pa por atende cu e retraso den cuido cu lo pone un peso extra riba cuido na Aruba”, Ir. Jacobs a copnclui.
