Habemus Gobierno! - *Nomber di Ministernan y carteranan a bira conoci
ORANJESTAD (AAN): "Nos ta asina leu! 76 dia despues di eleccion nos a keda cla cu Formacion di Gabinete Wever-Croes-2!” Asina Prome Minister Evelyn Wever-Croes a declara, pa pueblo Arubano, Diahuebs.
E mandatario a expresa cu tin hende cu ta bisa cu formacion di Gabinete Wever- Croes II a tarda demasiado, pero na su parecer el a tarda loke mester a tarda.
“Pa mi uza un quote di George Washington: ‘To form a new government requires infinite care and unbounded attention, for it the foundation is badly laid the superstructure must be bad’. E ta un proceso serio cu ta exigi hopi cuido, hopi atencion pa construi e fundeshi di confianza y stabilidad, pasobra un gobierno un gobierno stabil y fuerte ta rekeri di un fundeshi fuerte”, Premier Wever-Croes a expresa.
Prome Minister a agrega cu pa su persona, como formador, ta sigur cu e candidatonan cu el a presenta na Aruba, pa goberna nos pais ta digno di confianza.
“Nos a gana eleccion dia 25 di Juni. Partido MEP cu nuebe asiento, y nos a firma un declaracion di intencion cu Partido RAIZ, dia 8 di Juli 2021. Dia 9 di Juli, Gobernador a nombra mi como Formador. Dos luna pasa, exactamente! Y den e dos lunanan aki nos a negocia acuerdonan di gobernacion den lineanan grandi, pa despues bin cu reparticion di cartera. Y awor, nos a caba cu e partinan di nombracion di ministernan”, Minister Presidente Evelyn Wever Croes a relata.
Seguidamente, e dignatario a procede na menciona cual ta e minister nobo y a describi en breve, cada funcion. Esey por lesa den otro articulo.
Diahuebs den oranan di atardi, Evelyn Wever- Croes y su gabinete tabata tin un conferencia di prensa unda a presenta e ministernan cu lo wordo huramenta otro siman.
