ORANJESTAD (AAN) – Parlamentario di fraccion di MEP, Arthur Vallejo, basa riba preguntanan di prensa a splica cu for di momento cu AZV a wordo lanta,
ya caba tabata tin e pregunta si e instancia aki lo por bay carga e costonan di cuido medico, y e discusion tocante un reforma, y contribucion propio, ta data for di añanan caba.
El a bisa den e conferencia di prensa, cu semper tin dos tema cu ta importante cu nan ta trata durante reunion cu e Comision Fiho di Salud, y e temanan aki ta: 1. E campaña di informacion necesario, tocante e reformanan cu lo drenta na vigor; 2. E garantia di acceso na cuido medico.
Vallejo a bisa cu si por ehemplo, definitivamente, e pashent no tin manera pa cubri e gastonan di eigenbijdragen, mester tin un forma, of vangnet, na unda gobierno ta pone e fondonan disponible pa contribui cu e parti aki di cuido medico.
Kiermen, cu nunca lo por laga personanan sin acceso na cuido medico, y tampoco sin nan remedinan di custumber. “Si por ehemplo, un specialista ta duna y prescribi un remedi, esaki ta bay wordo cubri pa AZV. Remedinan generico ta bay wordo cubri pa AZV, tin diferente remedinan di marca cu nan ta wak cu nan no por sigui sustenta e fondonan necesario pa cubri e remedinan aki. Si e pashent no ta bay bon cu remedi generico, e tin e oportunidad di cumpra esaki cu su mes fondonan”, Parlamentario Arthur Vallejo a indica.
Vallejo a referi tambe na e uso di Paracetamol. El a bisa cu tin un uso exagera di e remedi aki na henter mundo. Hulanda, por ehemplo, tin añanan cu no ta cubriendo e Paracetamol mas, pasobra e ta mustra un costo cu ta hopi importante.
“Si wak bon, cuido di salud no ta algo cu ta keda stabil y keto. Cuido di salud ta un cos dinamico, cu ta trece hopi reforma y cambionan lihe, pa por garantiza semper e acceso y e cuido medico cu cada ciudadano merece”, Vallejo a comenta.
E no por a referi na con e proceso di “vangnet” lo ta pasobra ainda e Comision Fiho di Salud (parlamento) no a haya e informacion concerni. Asina Parlamentario Vallejo a splica, ora el a haya e pregunta di prensa, al respecto.
