Director di DPL, Ronny Irausquin:
ORANJESTAD (AAN) – Director di DPL, señor Ronny Irausquin, a comenta cu na principio di aña DPL a organiza un Job Fair (feria di trabao), hunto cu Iberostar Aruba. Irausquin a bin compronde for di nan departamento, cu nan a tuma den servicio, varios persona di esnan cu a solicita.
DPL ta bay tin un Feria di Trabao cu Secrets Baby Beach Resort, posiblemente den luna di Augustus. E prome parti nan lo hacie den dos fase. Esun di prome fase ta pa posicionnan manera Supervisor, Management, y otro funcionnan similar.
Y den lunanan di September, October, DPL lo tin otro Job Fair, pero pa e funcionnan mas comun cu un hotel ta pidi, manera housekeeping, etc. Esaki mas bien den lunanan di October, November.
“Pero pa aworaki, Augustus cu September, mi kier sa, nan kier pa nos yuda nan pero mas tanto pa e parti di supervisor, manager, etc”, señor Irausquin a indica.
Ronny Irausquin a menciona cu na DPL mes, tin hopi trabao vacante ta drenta, cu tur siman ta sali den corant y riba facebook. El a bisa cu interesadonan por yega na DPL Oranjestad of San Nicolas. Nan ta duna nan servicio di 8’or di mainta pa 11’or-11’or y mey, y nan ta online tambe. DPL cu mucho gusto ta yuda nan haya un trabao.
El a splica cu e sector di mas grandi cu tin na DPL pa loke ta busca hende pa traha, ta Horeca. Hopi di nan ta haci peticion cerca DPL. “Atrobe nos ta purba di busca hende, y si no haya ta keda na e dunador di trabao si e kier firma pa un persona. Esey tambe ta un posibilidad”, Irausquin a señala.
El a agrega cu aworaki tin dos hotel cu casi tin fecha pa bay habri, y otro cu ta pendiente. Kiermen tin practicamente tres cu ta bay habri, si por bisa cu cada hotel tin mester di 400 trahado, ya tin 1200 hende cu mester y esey ta un demanda hopi grandi pa locual ta trata DPL. “Nos lo wak si tin asina hopi hende. Mi no kier bisa cu no tin, pero tin ora cu ta un poco dificil pa haya tanto hende asina. E di dos ta e parti di construccion cu ta un mercado cu hopi demanda di trahado”, segun director di DPL.
