Variante Omicron a cambia advertencia IMF den realidad internacional --- Prome analisis di resultado di pronostico economico nobo pa 2022 --- Paisnan mester prepara pa obstaculo den e recuperacion di economia
ORANJESTAD (AAN)- Na momento cu mundo a drenta e segundo parti di 2021, e Fondo Monetario Internacional, a emiti su pronostico pa 2022 cu a bira uno historico.
IMF a basa su pronostico di economia mundial na 2022 riba desaroyonan di Covid-19.
Manera DIARIO e tempo a mustra su lectornan, Fondo Monetario Internacional a adverti mundo cu realidad economico di 2022, cu ta e base pa e realidad financiero y social cu por spera, lo depende di tur hende.
Fondo Monetario Internacional no a expone e forma cu hende ta gasta placa por ehempel como base pa dicidi kico 2022 lo trece. E organisacion mundial cu ta atende cu e mundo financiero, a mustra cu e forma cu hende ta comporta enfrente Covid-19 lo dicidi riba economia mundial na 2022.
Na momento cu Omicron a presenta, e fondo (IMF) a splica cu su temor a bira realidad y cu e lo por haya su mes obliga di baha e pronosticonan pa e recuperacion economico mundial na 2022.
Kico esaki ta nifica?
Na prome lugar cu hende, cu no kier a tende ni rasona, a percura pa mundo ta den mas problema financiero, economico y social for di momento cu Omicron a presenta como variante di Covid-19.
Si tur hende a tene nan mes na e medidanan pa preveni e malesa y a vacuna, por a evita cu e virus lo a sigui plama y asina sigui afecta produccion economico y financiero mundial y asina bida di e ser humano.
E recuperacion mundial di Covid-19 segun Fondo Monetario Internacional lo ta menos rapido cu a spera.
Kico esaki ta nifica?
Pa contesta e pregunta aki mester realisa cu Fondo Monetario Internacional ta e instancia internacional cu ta duna paisnan asistencia y conseho den e maneho di nan situacion financiero y nan moneda como resultado.
Fondo Monetario Internacional mester yuda por ehempel Aruba, percura pa Florin Arubano mantene su forsa loke ta encera, cu e pais mester conta cu un base financiero y economico solido.
Fondo Monetario Internacional a pidi tur hende na mundo, pa percura pa e virus no sigui plama y evita cu mas variante lo presenta.
E prome conclusion di e analisis aki ta pues, cu hende mes a yuda Omicron haci su entrada na mundo y asina sigui afecta bienestar di hende na mundo.
Segun Fondo Monetario Internacional, hende mes a haci cu Omicron por a presenta y bira otro problema pa hende atende y otro obstaculo pa crecemento economico y financiero mundial.
E segundo conclusion ta bira awor, kico paisnan ta haci.
Na prome lugar, por nota con rond mundo awor mas hende kier cumpli cu regla di prevencion. Na mes momento rond mundo, awor gobiernonan ta tuma medida mas severo pa evita Omicron sigui plama.
E tercer conclusion ta, cu otro siman mas informacion riba Omicron mester wordo spera pero tambe mas informacion di Gobiernonan rond mundo con ta atende cu e peliger cu recuperacion mundial ta tranca.
E entrada pa 2022 a bira mas dificil.. Con gobiernonan rond mundo lo atende cu esaki?
Te awor poco ta conoci di e virus y su impacto berdadero. Pero tur gobierno na mundo mester prepara un version nobo di nan plannan financiero y economico pa atende cu e posibel resultadonan di e virus.
DIARIO lo sigui informa Aruba riba e particularidad aki tambe pero ta adverti cu awe mas cu nunca tur hende mester sigui regla pa proteccion di nan mes y di comunidad.
Awe mas cu nunca tur miembro di comunidad Arubano mester realisa cu recuperacion mundial a bira mas dificil y por baha resultadonan pa futuro pa Aruba, cu ta depende di resto di mundo pa su turismo, su importacion y su bienestar!
