ORANJESTAD (AAN): Atrobe mas indicacion ta sigui drenta cu e investigacion dirigi principalmente riba iregularidadnan den otorgamento di
un cantidad grandi di terenonan comercial di erfpacht den e periodo di aña 2017 pa aña 2019, conoci como ‘Caso Flamingo’, ta siguiendo di ta activo.
Caso Flamingo ta un investigacion pa haya sa si un of mas compania na Aruba a logra obtene incorectamente un opcion riba terenonan di erfpacht den e periodo di November 2017 pa December 2019, caminda ta investiga tambe e eventual rol di e minister anterior.
Apenas siman pasa, esta Diamars 1 di Maart 2022, autoridadnan local di LandsRecherche a detene e muher di inicial E.F., pa start cu interogacion. Den pasado a yega di tene un razzia na su cas unda a confisca monton di documento, computer, y demas data.
Siman awor a habri, cu e detaye cu LandsRecherche cu asistencia di Polis a tene un razzia na un cas na Kurimiauw, cu ta keda un poco mas pariba di Kamay na Noord.
E cas aki ta di e ciudadano Humphrey ‘Fito’ Croes. Oficialnan di LandsRecherche a yega prome cu solo a sali, y a lante for di soño, indicando cu nan tin orden firma, pues ta tur autoriza pa cu e ‘entrada hudicial’ den su cas.
Aki a busca y confisca varios computer y documento, pa asina bay cune pa yuda den e investigacion, den su caso specifico, cu tin di haber cu iregularidad di obtene tereno.
Nan a aresta Fito Croes y a bay cune Warda di LandsRecherche den Vondellaan pa cuminza cu e proceso di interogacion.
