Ademas di exigi di no por traha mas como ambtenaar cu mucha
ORANJESTAD (AAN): Tabata riba un Diabierna mainta trempan, esta 16 di Juli di aña pasa, cu varios unidad di Polis di JZP y demas autoridad, a presenta di sorpresa na un adres di islanan Caribense den Tarabana, enbusca di e homber Franklin J.G. Priest di 36 aña di edad. E homber aki ta Coach di Team di Futbol di muchanan di Brazil Jrs., y tambe ta un Ambtenaar trahando den veld di Enseñanza.
Su detencion ta pa actonan inmoral contra menor di edad. Y riba Diabierna su caso a wordo atendi den Corte di Husticia na Aruba.
Diabierna den oranan di merdia te den oranan di atardi, Hues di Corte di Husticia a trata e caso penal cu Ministerio Publico a cuminsa contra e homber P., kende ta wordo acusa di a haci actonan inmoral y purba penetra un mucha homber di 14 aña.
SOSPECHOSO TA DESMENTI
E acusacion di Fiscal contra P. ta cu riba 31 di Mei 2021 mas o menos 11.30 di anochi, el a haci actonan inmoral y purba penetra un mucha homber di 14 aña. Ta asina cu P. ta desmenti Hues a bisa cu un dama a haci denuncia. 31 Mei 2021 e wela a spierta den careda di 11.30 di anochi y a ripara cu e mucha homber no ta den cas. Despues e mucha core drenta cas soda y lomba sunu.
Via camera di seguridad, Polis a mira un homber drenta e cas y despues a sali. P. a admiti cu t’e y cu el a papia cu e mucha. E mucha a bisa cu e tabatin contacto cu P. via chat y P. a palabra cun’e pa topa personal. Nan a topa den misa Cristian. E mucha ta bisa cu ora P. a yega cas e tabata kier pa e bay cun’e den auto. E mucha a bisa cu e kier keda cas. El a bay cu P. pafor y P. a haci actonan inmoral cun’e. Segun e mucha el a bay den auto di P. y P. tabata kier a penetr’e.
POTRETNAN DI MUCHA HAYA DEN CELLULAR
- a desmenti categoricamente cu el a haci algo inmoral. Hues a mustra cu tin imagen caminda ta mira P. ta sali for di e cas ta subiendo su jeans. Segun P. el a bay cerca e mucha, pasobra el a tende na misa cu e mucha tin problema y ta corta su mes cu menos bon intension. El a bisa cu e tabata papia cu e mucha riba chat riba e problema aki.
Hues a bisa si no ta algo no normal cu ta bay den oranan laat di anochi na e cas. Hues mustra cu for di cellular di P. a mira cu for di Januari 2021 e tabatin contacto cu e mucha. Den cellular di P. a haya diferente potret y di un mucha di 15 aña. E mucha a bisa Polis cu P. ta un maniac y ta busca muchanan pa tin relacion cun’e. P. a desmenti esaki totalmente. Segun P. ta e mucha ta manda potret pa P. Hues a bisa cu e mucha ta nenga di tin contacto cu P. y a manda potret.
Hues a puntra P. kico e ta pensa di e 3 acusacionnan aki. El a bisa cu eseynan no ta berdad.
FISCAL A MUSTRA POTRETNAN
Fiscal a puntra P. cu el a bisa na Polis y den Corte cu el a bay pa yuda e mucha. Fiscal a remarca cu P. a declara na Polis cu hende a bis’e cu tin un mucha cu kier mata curpa y a corta pols. P. a bisa e persona pa yama un dama J. Fiscal a puntra pakico P. ta bay 11.30 di anochi na e cas, siendo e no ta e persona indica. Segun P. e sa atende caso cu e persona y pesey el a bay pa despues hunto cu e dama J. bay atende e mucha. El a bisa cu e sa atende casonan asina cu e persona J. Fiscal a remarca cu ta straño cu P. no a papia nada cu J. despues di a topa cu e mucha na su cas. Fiscal a sigui bisa si no ta raro cu 11.30 di anochi P. ta bay laga mucha sinta den auto cun’e siendo e no conoce.
Fiscal na dado momento a bay cu su laptop na Hues pa mustra imagennan di potret cu el a haya. Tanto e sospechoso cu su abogado a bay para dilanti Hues pa mira. Fiscal tabata haci e sospechoso diferente pregunta.
MESTER HAYA AYUDO DI PSICOLOGO
Ta asina cu P. ta un “leerplicht ambtenaar” y actualmente ta suspendi desde September 2021. Hues mustra cu tin un raport di Reclasering cu ta mustra cu P. ta hopi deportivo y tabata coach di un team di futbol. Reclasering ta bisa cu si acaso P. wordo haya culpable, e lo mester haya guia di psicologo.
Hues a sigui bisa cu tin raport di psicologo cu ta mustra cu P. ta compronde kico ta bon y malo. E psicologo ta haya cu P. mester ayudo psicologo y guia di Reclasering pa siña controla su emocionnan. P. a bisa Hues cu e no ta reconoce su mes den e raport aki.
FISCAL A BAHA PISA
Fiscal a bisa Hues cu e ta haya cu tin suficiente prueba di sosten. El a mustra cu e mucha a declara cu dia 30 Mei 2021 el a bay misa cu su omo y el a topa P. den baño y nan a papia cu otro. El a bisa cu den pasado P. lo a mand’e mensahenan pero no reacciona. 31 Mei 2021 e sospechoso lo tabata chat pero den delete mode cu e mucha. E sospechoso P. kier a top’e y a bay na e cas. P. tabata kier pa e mucha bay cun’e den auto. E mucha a bisa cu no mihor keda na cas. Tanto den e cas como den e auto, P. lo a haci actonan inmoral cu e mucha y hasta a purba penetra e mucha.
Fiscal a bisa Hues cu ley tey pa proteha muchanan menor di edad pa no wordo abusa. E sospechoso P. ta conoci como coach di futbol cu ta traha cu muchanan. Su trabao ta pa yuda y salba guardia muchanan pa sigui studia. Fiscal ta haya cu P. no a haci su funcion sino a sigui su gana di inmoralidad. Fiscal ta haya cu P. no por sigui haci e trabou aki mas. E kier pidi pa prohibi P. pa sigui traha e funcion aki. Fiscal ta haya cu P. no a responsabilisa pa loke el a haci aunke e tin derecho di nenga.
Fiscal a exigi 4 aña di prison di cual 6 luna ta condicional cu un tempo di prueba di 3 aña.
Tambe Fiscal a pone condicion cu P. mester cay bou guia di Reclasering.
Tambe Fiscal a exigi pa prohibi P. pa haci su trabao te caminda ley ta permiti.
Hues despues di a scucha defensa di abogado mr. Illes, a sera tratamento di e caso y a bisa cu dia 4 di Februari 2022 lo tin sentencia.
