Studiantenan di 14 pa 18 aña por participa
ORANJESTAD (AAN): Bo ta cla pa bay mira un competencia di robot? Que hubo si abo como hoben participa activamente, fabrica un robot hunto cu amigonan, y asina trata di gana e careda! Esey lo ta mihor.
Informacion cu DIARIO a ricibi di Michelle Mendez Fonseca, kende ta relacionista publico di e asina yama ‘The STEM Embassy’, ta corda cu nan ta un organisacion cu ta consisti di studiante di Aruba y Curaçao den STEM (Ciencia, Technologia, Ingenieria, y Matematica). Nan meta ta pa introduci y promove STEM na e hubentud di e islanan ABC.
E aña aki nan ta organisando e prome Hackathon Robotics Challenge yama “Sustainability In Motion” for di dia 29 di April te cu 1 Mei pa participantenan di 14 te cu 18 aña di edad. E studiantenan mester ta den scol secundario (EPB, MAVO, HAVO, VWO) y e registracion ta costa 30 florin.
Na e prome dos dia nan di e evento nos lo duna workshops di: (*) Sustainable Transportation. (*) Electrical Engineering. (*) Computer Programming. (*) Mechanical Engineering.
Robotics Challenge: E ultimo dia, 1 di Mei, e robotics challenge lo tuma lugar unda e participantenan mester diseña un y programa nan mesun robot pa resolve un problema di Aruba.
Nan ta pidi studiantenan di Aruba pa bay yuda nan traha un sistema di transporte nobo y sostenibel pa Aruba. Na e hackathon, tur team participando lo haya un robot di nan. Como ingeniero nobo, abo ta haya un lista di pasahero cu abo mester transporta. E pasahero ta bay na diferente bario, y mester wordo hiba na nan propio destinacion. Pero abo como studiante tin di bay planea e ruta mas mihor. Despues bo tin di bay programa bo robot pa core e ruta. Bo robot pues ta bay competi contra otro team.
E robot cu ta finalisa prome, ta gana e match! Pues si abo kier siña traha cu robot, pero bo no sa unda pa cuminsa. Aplica pa e hackathon aki riba nan website thestemembassy.com
Nan meta ta pa haya lo mas hopi studiante di Aruba participa, y asina haya e bunita oportunidad di doe mee na e workshops y experiencia e mundo di Engineering y Tecnologia.
