Juffrouw Vanesa Croes ta informa:
*Un anochi magico na Renaissance Convention Center dia 3 di Mei
Vanessa Croes, di Scol Amplio Mi Cosecha, den entrevista cu DIARIO a anuncia un actividad cu e meta di recauda fondo pa e scol aki, por yega na su bus escolar.
“E bus aki ta netamente pa por transporta e muchanan pa bay practica loke nan ta siña na scol, den e bida real” Juffrouw Vanessa a menciona.
El a agrega cu, por ehemplo, ora nan ta bay supermercado nan ta bay haci tareanan, nan ta bay haci e parti practico di loke nan ta siña na scol.
“Y tambe nos ta crea cu e lugar di enseñanza hopi biaha ta varia. Cu no ta keda solamente den un clas, manera nos ta yam’e den cuater muraya, sino cu enseñanza ta tuma lugar den otro localidad. Y esaki bo ta wak cu ta motiva nos studiantenan, e ta haci nan hopi independiente, y nan ta explora, descubri nan talentonan loke tin un impacto positivo riba tur mucha; pasobra tur mucha por beneficia di siña tambe di e experiencia”, Juffrouw Vanessa a enfatiza.
E actividad pa recauda fondo lo ta dia 3 di Mei. Esaki ta bay ta un anochi magico, cu un explosion musical door di diferente banda, den Renaissance Convention Center, cuminzando pa 8’or di anochi. E lo tin yen di sorpresa cu bo mester ta presente pa experiencia esaki, Juffrouw Vanessa Croes a bisa.
“Tur e fondonan cu nos lo recauda na entrada, ta destina specificamente pa e bus. Pa ticket por inbox riba nos facebook page, scol amplio nos cosecha y nos ta manda bo e link, haci e pago y disfruta di un anochi fenomenal. Balia cu bo curazon y alavez aporta pa un bon causa”, Vanessa Croes a relata.
Scol Amplio Bo Cosecha ta conta cu e contribucion di comunidad y di tur comerciante cu por duna un aporte, pasobra esnan cu ta bay beneficia ta e muchanan. “Nos no tin cu warda ora circunstancia of condicionnan den enseñanza pa nos duna e man. Laga nos ta preventivo pa nos por traha na un forma innovativo, na loke ta desaroyo di cada mucha”, Juffrouw Vanessa Croes a remarca.
