Dr. Marck Oduber di Comision Nacional di Aruba pa UNESCO:
ORANJESTAD (AAN): Dr. Marck Oduber di Comision Nacional di Aruba pa Unesco a splica durante un entrevista cu DIARIO tocante e condicionnan climatologico den Caribe y Atlantico. El a splica cu e caso di e condicionnan di oscilacion climatologico, ta pone cu e lama ta hopi calor den e ultimo temporada caba den e region Caribense.
E otro banda tambe, el a menciona, cu ya nos ta observa cu El Niño cu ta bahando, y ta proyecta cu e El Niño aki lo ta un El Niño hopi fuerte mes, compara cu den pasado. Segun Oduber, esaki tin su efecto directamente riba un isla manera Aruba. Esaki ta nifica menos awacero. Por lo principal, Aruba lo ta mas calor tambe cu lo normal.
El a duna di conoce cu e lama rond di Aruba pa casualidad ta mas calor cu normal. Pero cu cada situacion di tempo tin otro parametro ta pasa. Segun e, ta proyecta un El Niño cu ta pone cu nos ta mas seco cu normal, por ta tin tiki mas biento cu ta haci cu awa tiki mas friu ta bini ariba. Anto esey ta balansa tambe e temperatura di awa di lama.
Señor Oduber a remarca cu actualmente, e ultimo observacionnan rond den Caribe ta mustra cu e temperatura di Aruba lo ta mas calor cu normal, y menos awacero tambe specialmente durante nos temporada di awacero, cu ta e proyeccion normal cu ta wordo proyecta pa El Niño, specialmente uno hopi fuerte. Esaki ta ocaciona tambe cu temporada di horcan un tiki mas calmo.
E climatologo a remarca cu e biaha aki El Niño ta basta fuerte, y ta proyecta ainda pa yega su peak mas of menos den December y te cu awo, e efecto ta mustra cu lo tin un temporada di horcan hopi calmo. Segun e, te cu awo no tin niun horcan menciona cu a wordo registra den Mar Atlantico. Pero si tabata tin un par di tormenta tropical.
“E biaha aki si por wak cu El Niño su efectonan secundario ta basta fuerte, cu aunque cu e lama den Atlantico y den Caribe ta tiki mas calor cu normal, e efecto cu ta pone un tormenta tropical of un sistema tropical desaroya ta mas chikito”, señor Oduber a duna di conoce.
