Bo tambe ke inverti den bo salud? Bo tambe ta buscando alivio pa bo dolor di lomba, dolor di rudia, dolor di nek, schouder, elleboog?
Hopi di nos ta sinta of cana of lanta para den posicionnan robes, cu despues di tempo ta causa desgaste y hopi malestar.
Por ehempel hopi biaha nos ta kere cu nos ta sinta comfortable, mientrastanto nos ta tene e lomba dobla y e uzo di celular constantemente no ta yuda tampoco. Y door di tene nek y lomba dobla aña den aña afo, dolornan ta cuminsa, despues e ta bira cronico paso nos no a busca ayudo na tempo.
Awo ta e momento pa bo duna bo curpa loke e tin mester. Diasabra 30 lo tin un workshop di Feldenkrais, organisa pa Fundacion Feldenkrais Aruba i.o. Feldenkrais ta un metodo caminda bo ta haci movecionnan suave y poco-poco. E movecionnan aki ta fungi como informacion pa bo cerebro. E movecionnan ta haci cu bo ta sina observa bo curpa. Otro nomber pa e lesnan di Feldenkrais den grupo ta: Autoconciencia pa medio di movecion.
Por ehempel bo ta ripara cu un schouder ta mas pisa cu e otro. Un banda di heup ta mas bira cu e otro, etc, etc. Y door di haci e movecionnan chikito, suave y poco-poco cu atencion, bo sistema nervioso ta ricibi informacion riba e diferente partinan di e curpa. Y e sistema nervioso ta bay ahustando e posicion di e curpa pa e ta den un posicion cu ta miho p’e curpa. Y pesey e dolornan ta cuminsa desaparece.
E metodo di Feldenkrais ta pa tur edad. E ta yuda henter e funcionamento di bo curpa. Si bo ta haci deporte, e ta yuda bo haci e deporte miho. Si bo ta balia, e ta yuda bo balia miho. Paso e ta yuda bo cambio e custumbernan di e curpa pa miho. Feldenkrais ta hopi efectivo y ta traha riba tres nivel. E ta haci e curpa mas flexibel, e ta haci e emocionnan bira mas trankil, paso bo ta bira mas consciente di kico bo ta sinti, y e ta haci e mente bira mas flexibel; e ta traha coneccionnan nobo den e cerebro.
Registra mas lihe posibel pa participa na e workshop di Feldenkrais aki, bou di guia di e practitioner di Feldenkrais: sra. Amy Lasten.
E cuponan ta limita.
Fecha: Dia 30 di April di 9or am pa 4’or.
Luga: Alto Vista 147. Tin un lunch simpel inclui. Yama na cel 5920770 pa mas informacion.
