ORANJESTAD (AAN) – Pa loke ta e tarifa di grondbelasting, Meverly Romano, Relacionista Publico di Departamento di Impuesto (DIMP),
a reitera cu e sistema actual ta conoce tarifa cu ta depende di e valor di e propiedad, y a menciona e diferente porcentahe cu e contribuyente mester paga.
Ademas, a splica tocante e fechanan di pago di e cobranza di grondbelasting (impuesto riba propiedad) pa 2021, cu a wordo saca caba.
TARIFA:
Por ehemplo, pa personanan residencia na Aruba e tarifa ta varia entre 0% te cu 0.6%. No ta paga grondbelasting esnan cu nan propiedad tin un valor di 120 mil florin of menos. Esnan cu ta paga 0.6% ta esnan cu e valor di nan propiedad ta 750 mil florin of mas, y asina tin diferente tarifa.
Pa personanan cu no ta residencia na Aruba e tarifa ta fiho. E ta 0.6% di e valor di e propiedad y tambe pa percelanan cu ta comercial, ta 0.6% di su valor.
COBRANZA Y FECHANAN DI PAGO:
Encuanto e cobranza di grondbelasting, Meverly Romano a bisa cu Departamento di Impuesto ta saca esaki tur aña, den e periodo aki, y tur persona cu tin un propiedad inmovil ta custumbra cune caba.
“Nos a caba di saca e cobranza di 2021. E tin fecha oficial di 31 di Mei, y e prome termino di pago ta caduca aki un luna, cu ta dia 30 di Juni. E Ley di Grondbelasting ta permiti e personanan cu tin cu paga esaki pa paga e impuesto den termino. Cada termino ta igual cu un cuartal di aña y cada un ta vence na final di e cuartal”, Romano a splica.
El a agrega cu aworaki ya e mitad di aña ta bayendo y e cobranza tin fecha 31 di mei, y e prome termino ta caduca dia 30 di Juni. Segun ley, e personanan cu a haya e cobranza lo mester paga 50% di e suma, pa dia 30 di Juni. E siguiente 25% ta e siguiente cuartal, cual ta caba dia 30 di September, y e ultimo termino cu ta calcula dia 31 di December lo mester wordo paga dia 3 di Januari, debi cu 31 di December, normalmente Servicio di Impuesto ta liber, y e fecha final ta wordo extende na e prome dia di trabao di 2022.
Asina aki e Ley ta duna espacio na e contribuyentenan pa haci nan pago di grondbelasting. Romano a subraya cu naturalmente, por sosode cu e suma di e cobranza ta di tal forma cu e contribuyente no por haci su pago riba e termino legal, y den esaki Departamento di Impuesto ta duna e facilidad pa haci un areglo di pago.
