Directora di DIMP Luenne Gomes-Pieters:
ORANJESTAD (AAN)—Directora di Departamento di Impuesto Drs. Luenne Gomes-Pieters, den conferencia di prensa a indica cu ultimo dia pa entrega e formulario di winstbelasting, ta dia 31 di Juli awo, esta, diaranson di e siman aki.
Directora di DIMP a declara cu manera e lunanan ta pasando y aña ta bayendo, DIMP ta informa su contribuyentenan, y esnan cu ta pendiente di e fechanan final pa entrega nan formulario di impuesto, con esaki ta bayendo y con ta para cu cumplimento, kico ta loke DIMP ta mira den su sistemanan digital, y kico ta e puntonan di atencion cu nan ta haya importante pa comunica na e contribuyentenan y asesornan fiscal.
Directora di Departamento di Impuesto a menciona cu awo ta toca e turno di winstbelasting cu aworaki ta otorga den forma digital, cu ta un proyecto cu desde aña pasa DIMP a cuminza cu ne. E ekipo di profesionalnan di DIMP a traha hopi duro riba e sistema digital, pa asina por sostene nan contribuyentenan y asesornan fiscal pa por entrega e formulario di winstbelasting na forma digital.
“Si nos tur por mira y ripara, e unico formulario cu a keda pendiente aworaki, cu ta wordo otorga den forma di papel ta e formulario di Inkomstenbelasting unda tur e personanan natural, personanan individual, ainda lo mester keda yena esaki den forma manual y entrega esaki, na Departamento di Impuesto”, Luenne Gomes-Pieters a señala.
Gomes-Pieters a indica cu siguiente cu DIMP su programanan di digitalizacion, pa digitaliza e formulario di Winstbelasting, a duna diferente tayer di informacion na asesornan fiscal. Contribuyentenan mester entrega esaki y netamente e ta pa e sector comercial na Aruba.
E fecha final pa entrega e formulario aki di winstbelasting ta dia 31 di Juli, pues Diaranson di e siman aki.
DIMP a bin ta informa su contribuyentenan pa un par di siman caba, e ultimo lunanan. Y pa tene cuenta cu pa nan haci esaki den forma digital, nan mester tin un account den DIMP su online portal/impuesto.
“Nos a duna un luna mas di tempo, mirando cu e introduccion aki di formulario electronico por ta algo cu e contribuyentenan mester custumbra cu ne, y nos a duna un luna mas p’asina dia 31 di Juli ta un fecha factible pa tur contribuyente, vooral comercio, pa entrega nan formulario”, Luenne Gomes-Pieters, director di DIMP a reitera.
