Shailiny Tromp-Lee:
ORANJESTAD (AAN): Durante e reunion Tripartiet di Parlamento di Aruba, Corsou y Sint Maarten, cu a tuma luga dia 15 di october na Corsou, Parlamentario Shailiny Tromp-Lee a enfatisa e importancia di sigui avansa cu e proceso di e Geschillenregeling. E mecanismo aki ta destina pa atende y soluciona e diferencianan di opinion y disputa cu por surgi entre e paisnan den Reino Hulandes.
Tromp-Lee a expresa su gradicimento na e Petit Comite, encabesa pa colega Vrolijk, pa e trabao realisa riba e concepto. E ta di opinion cu e deliberacionnan interno di cada pais mester tuma luga na su propio pais, pa despues cada un por determina y comunica formalmente su posicion.
Durante e reunion, e delegacionnan a yega na un acuerdo concreto: no mas tarda cu dia 16 di november 2026, cada pais mester trata e concepto di Geschillenregeling den su forma actual. Si un pais ta di acuerdo cu e concepto, e mester manda un carta formal di sosten (steunbrief).
Pa Tromp-Lee, e acuerdo aki ta un paso concreto den e proceso, pasobra e ta duna cada pais e oportunidad pa delibera internamente y formalisa su posicion, cu un fecha cla pa e siguiente paso.
Posicion di Aruba: Un Geschillenregeling ta fortalece e posicion di Aruba! E Geschillenregeling ta importante pasobra e paisnan den Reino lo tin un mecanismo formal pa trata diferencianan di opinion, en bes di laga un conflicto sin un ruta cla pa busca solucion.
Un mecanismo asina por contribui na mas claridad legal, mas siguridad den e relacion entre e paisnan y un proceso mas structura pa trata diferencianan, basa riba dialogo y procedemento acorda.
“Pa Aruba, un Geschillenregeling ta importante pasobra nos mester tin un manera cla y transparente pa trata diferencianan dentro di Reino, unda nos posicion y nos interesnan ta wordo tuma na cuenta.”
Tromp-Lee a subraya cu e siguiente paso ta den man di cada pais: evalua e concepto y formalisa su posicion dentro di e fecha acorda, pa e proceso por sigui avansa.
