Jessica van Montfoort-Posner, PR FCCA:
ORANJESTAD (AAN) – Jessica van Montfoort –Postner, Relacionista Publico y Marketing di FCCA, a bisa den entrevista cu DIARIO, cu e Fundacion ta hopi enfoca den yuda e gruponan cu tin un tiki mas di dificultad pa yega na un cas adecua y economico, por ehemplo e starters, studiantenan, etc.
“Esaki tambe ta algo cu nos a tuma nota di dje, y nos ta bezig cu algun partner estrategico, pa por comberti edificionan bieu den apartamentonan pa e grupo aki, dus mirando starters, studiantenan, hendenan cu ta net cuminzando. Nos ta enfocando riba futuro cercano pa nan, y esey ta meta.
“ Otro cos cu nos tin hopi atractivo pa nan ta nos hipoteca, pues nos ta ofrece terminonan di pago tambe masha interesante, cu nan por yuda nan yega na nan propio cas, sin cu e ta mucho pisa financieramente.
Tambe nos ta bezig cu un proyecto cu verkaveling di tereno, pero tambe tereno ta birando hopi scars na Aruba, pues esey tambe por ta un tiki mas dificil, pero nan por cumpra un cas y eynan si nos por yuda nan cu hipoteca pa cu esaki”, Jessica van Montfoort a reitera.
El a agrega cu personanan cu ta buscando vivienda por pasa na FCCA pa wak e posibilidadnan.
