ORANJESTAD (AAN): Dialuna anochi laat, varios habitante den area di Savaneta a keda den scuridad,
ora cu coriente a bay. Mesora e compania NV Elmar a wordo notifica di e interupcion den e distribucion di coriente den e area di Savaneta y vecindario.
Ya pa 10:54 pm e tecniconan di NV Elmar a subi caya rumbo pa area di Savaneta y vecindario pa localiza e problema. Varios cas den Pos Chiquito y tambe na Sabana Basora a perde coriente. A nota cu tur fuse di wayanan den halto ta bon, y a cuminza pensa cu ta trata di problema cu kabel bao tera.
E ora pa 11:30 pm, e tecniconan a start cu e proceso pa “megger” e kabelnan di tension halto pa por identifica e problema. Como 20 minuut despues, e tecniconan tabata convenci cu nan a logra identifica e problema. Pues pa 11:50 pm exacto a indica cu oficialmente e causa di e interupcion ta debi na un kabel bao di tera cu a sufri daño.
Na mes momento, e tecniconan a start e proceso pa por isola e problema, y despues por reestablece e suministro di coriente. Pa 12:10 am di marduga, coriente a bin bek pa tur area di Savaneta, y pa 12:13 am ta tur hende a haya coriente bek.
