Directora Cetty Baarh a indica:
ORANJESTAD (AAN): Directora di FAVI, Sra. Cetty Baarh ta masha contento cu e video di conscientisacion cu nan a caba di lansa. Banda di esaki el a probecha pa duna di conoce cu aworaki FAVI tin registra 465 persona cu tin un of otro limitacion visual na Aruba.
El a agrega tambe cu nan tin 1795 persona cu tin un of otro problema cu bista. Esaki ta nifica cu tin hopi trabao pa haci y pa sigui haci.
Segun Baarh, nan ta kere cu un video manera esaki lo yuda pa conscientisa pa hendenan keda registra na FAVI.
Luna di augustus ta uno hopi importante pa FAVI ya cu esaki ta e luna di nan accion di donacion cu ta core di augustus pa december na unda cu FAVI ta bay recauda fondo pa por sigui brinda servicio. Nan ta hopi agradecido cu nan colectantenan cu e meta pa e fondonan por sigui drenta.
Tambe ta gradici tur donante cu ta yuda pa FAVI sigui haci su trabao, el a agrega.
E luna aki e accion di donacion ta inicia dia 28 di augustus. Ta haci un invitacion na cada colectante pa pasa busca nan lista pa nan por cuminsa colecta e sumanan pa FAVI. Si bo persona no ta riba un di e listanan di colectante, FAVI ta haci un yamada na comunidad di Aruba pa sea yama FAVI y bisa cu bo kier bira un colectante of un donante. Tambe por haci un ‘standing order’ y haci un donacion na cuenta di banco di FAVI na RBC Bank of Aruba Bank.
