ORANJESTAD (AAN) – Minister Presidente, mr. Evelyn Wever-Croes, siguiendo riba e tema di 12.6% y e clarificacion cu el a trece dilanti den conferencia di prensa di Dialuna, a bisa cu e cambionan cu mester a haci ta pone cu awe,
casi yegando na final di 2021, ainda Aruba ta depende di e sosten di likidez di Hulanda, y e ta calcula cu pa e di dos cuartal di 2022, ainda esey lo ta e caso.
“Y cu poder di Dios y cu hopi esfuerzo di cada ciudadano di nos pais, talvez na e di dos mitad di aña 2022, nos lo no depende mas di e sosten di likidez; pero pa e prome seis lunanan si”, Minister Presidente a reitera.
Wever-Croes a remarca cu sin e sosten di likidez, gobierno lo no por paga salario di empleadonan publico, cuido di salud, manera nan ta haciendo, seguridad di Cuerpo Policial, enseñanza, ni NADA!
“Pesey ta importante pa nos sigui cumpli cu e condicion, apesar cu FASE ta caba. FASE ta bay caba aworaki, y tin hopi hende ta bisa FASE ta caba y nan tin cu haya nan 12.6% bek. Esey tabata nos propuesta inicial, pero na caminda, despues cu e sindicatonan a bishita VNO el a cambia y a bira un condicion di Hulanda, cu si no corta e 12.6% nos no ta haya e sosten di likidez”, Wever-Croes a reitera.
E dignatario a pone enfasis cu aworaki gobierno ta den e situacion cu FASE ta bay caba, pero e ta depende di e sosten di likidez ainda y mester di e cooperacion di tur hende di sector publico y semi-publico pa sigui cumpli cu e condicion di e 12.6%.
“Claro, mirando cu FASE ta bay caba, esnan di sector semi-publico cu tabata deposita e placa aki den e fondo di FASE, no tin nodi di hacie mas. E placa por keda den e compania pa asina e por fortifica su reservanan y su base. Den sector publico e placa ey ta bay den sigui paga locual cu gobierno tin cu sigui paga y haci nos menos dependiente di Hulanda”, Minister Presidente a señala.
El a agrega cu esaki ta loke el a splica e sindicatonan tambe. Tambe e mandatario a splica e sindicatonan cu nan a cuminza delibera cu Hulanda pa nan cuminza papia y duna perspectiva, ki dia e empleadonan publico y semi-publico por mira cu nan salario ta bay bek na 100%.
“Nos a propone Hulanda pa duna nos espacio pa otro aña cuminza duna bek, anto e siguiente aña duna tur cos completamente, pa tur hende tin nan salario di 100%. Talvez e otro aña 6.3% por wordo corta, anto e siguiente aña 0% ta wordo corta”, e dignatario a subraya.
El a reitera cu e ta den deliberacion cu Hulanda riba esaki pero ainda no a haya contesta con ta bay duna e perspectiva aki, y si tur cos ta bon den e Conseho di Minister di Reino, otro siman, dia 26 di November e tema aki por wordo trata si nan keda cla cune y si no, e ta bira e fecha 17 di December. “Nos a palabra cu e sindicatonan cu nos lo bin hunto bek, prome cu e reunionnan aki di Conseho di Minister di Reino pa nos informa nan kico ta e posicion di Hulanda riba esaki”, Premier Wever-Croes a declara.
