Obra teatral ‘Spirito’ den Cas di Cultura
ORANJESTAD (AAN): Durante luna di October venidero, Aruba lo bay cera conoci cu un obra teatral di caliber halto, cu lo bay keda sigur marca den historia, y cu lo por kizas competi den futuro tambe na festivalnan internacional di teatro.
Un obra teatral cu decór inigualable riba stage di Cas di Cultura, y lo bay combina cu diferente avance tecnologico tambe pa haci e obra “Spirito” bira esun cu tur hende lo bay papia y memoriza como esun di mas grandi di 2023.
Durante un conferencia di prensa convoca den sala grandi di Cas di Cultura, e productora y actriz Faritah Luidens a haya kippevel ora el a tende cu tin chens pa e bay traha hunto cu e directora Hilda Hellwig, kende tin un curiculo extenso di obranan teatral cu el a dirigi. E ta ainda sorprendi cu e directora a escoge un isla chikito manera Aruba pa e duna tur su tempo pa bin presenta un obra di Henrik Ibsen. “Mi ta bisa boso, e cos aki tin biaha mi ta lanta mainta y puntra mi mes si mi ta sigur cu mi ta bay actua den e obra aki, pasobra e ta algo pa mira con e bon directora nos tin, con e por cambia cos, y e ta fantastico,” Luidens a splica.
“Si abo no bin mira e obra teatral, bo ta bay perde di algo, pasobra pa Aruba presenta un obra di e magnitud aki, a petje af,” Faritah Luidens conoci como “Tica Basha Bou’ a bisa. Pesey e ta gradici Vicky Arens y Cas di Cultura cu e oportunidad pa e actornan por presenta esaki y pa Hilda haci un bon trabao.
E dos obranan teatral aki lo pasa dia 20 y 21 di October 2023 den Cas di Cultura.
