Contrata door di Merca pa yuda den lucha contra narcotrafico
ORANJESTAD (AAN): E avion cu a capta atencion mundial desde 2019 caba pa e hecho cu e por keda bula masha hopi dia y siman sin cu mester ateriza, esta ‘Skydweller’, lo por bay ta visible dentro di poco riba Lama Caribe, y specificamente islanan di Aruba, Bonaire, y Curaçao.
E compania Skydweller Aero a indica cu nan a caba di haci e prome vuelonan autonomo di e avion aki, cu un carga pisa abordo, cu a keda bula pa hopi tempo y sin ningun persona abordo, awor cu nan a instala sistema di fly-by-wire pa bula cune. E avion aki antes tabata conoci como ‘Solar Impulse 2’.
E compania Mericano/Spaño Skydweller Aero a adkiri e avion aki na 2019 despues cu e avion a finaliza un vuelo pilotea rond mundo riba energia solar. Aunke e tabata diseña pa carga un piloto, awor tin sistema special y flight-control computers pa asina bula e avion aki via remote-control.
Pa e avion aki por keda bula lunanan largo, mester a desaroya un sistema automatico cu cantidad di backup, pa e por sigui bula su so.
Awor cu e tin un sistema di fly-by-wire, e avion a ricibi un certficado di regulador di aviacion di Spaña, esta AESA. Den vuelonan di prueba, e sistema a keda bula e avion riba su mes, for di ora e lanta vuelo, te ora cu el a baha, sin cu ningun hende of piloto a mishi cu e controlnan. Aunke tabatin un piloto di emergencia sinta abordo durante e prueba.
E avion Skydweller pues awor por bula cu 3 moda. Moda 1 ta cu un piloto abordo. Moda 2 ta usa e sistema autonomo di vuelo abordo. Moda 3 ta usa un piloto na tera cu ta bula via remote control.
A sali na cla, cu United States Navy a firma contract cu Skydweller. Specificamente US Southern Command, y tambe Africa Command, pa bula e avion for di Merca, pasa riba Caribe bao di un Joint Concept Technology Demonstration (JCTD).
E plan ta pa bula riba mision di seguridad riba e islanan Hulandes di Aruba, Bonaire, y Curaçao, como tambe e islanan Frances di Guadeloupe y Martinique. E compania tin algun Memorandum of Understanding (MOU) tambe cu gobiernonan Frances y di Luxemburg.
Nan ta haya cu Caribe ta un bon lugar pa haci demostracion di e aparato aki, y si acaso tin un emergencia, tin varios base den e area unda por haci aterizahe.
Un di nan plannan ta pa laga e avion bula pa 365 dia largo (sin ateriza), for di Miami te na Rio de Janeiro (Brasil).
