ORANJESTAD (AAN): Family Justice Center tambe ta parti di e Crisis Plan Social. Durante un conferencia di prensa Dialuna mainta, Daphne Tecklenborg a papia riba e motibo pakico a bin cu e Family
Justice Center pa Aruba.
“E meta principal ta pa mehora cooperacion entre instancianan pa loke ta trata victimanan di abuso sexual of maltrato fisico”.
Den veld ta wordo constata cu tin mester di mas balanza entre investigacion y ayudo practico.
Investigacion y ayudo den casonan asina mester tey pronto, na unda cu menos caso ta wordo manda di un caminda pa otro.
Na e momentonan aki victimanan mester conta nan storia na diferente caminda, cual tin como consecuencia cu tin biaha nan no ta bin bek, segun Tecklenborg.
E a sigui bisa cu Aruba a tuma su tempo y a orienta su mes riba proyectonan internacional cu ta exitoso.
Aki a enfoca riba proyectonan manera entre otro Child Advocacy Centers na Merca, ‘Barnahus’-nan na Noord Europa y Family Justice Centers na Merca como tambe na Europa.
Segun Tecklenborg, e proyecto tin 4 meta principal.
“Nos kier minimaliza e cantidad di caminda unda un victima di abuso sexual of maltrato fisico mester pasa pa haya e ayudo necesario”.
Tur servicio ta den 1 edificio.
Nos kier minimaliza e cantidad di biaha cu un victima mester ripiti su storia y nos kier moderniza y mehora e proceso di investigacion medico y forensico.
Banda di esaki nos kier un aumenta e cantidad di denuncia dentro di 72 ora, e asina yama ‘acute aangiftes’, cual lo mehora e recoleccion di prueba, segun Tecklenborg.
El a menciona tambe e organizacionnan cu ta den e proyecto piloto, esta Directie Sociale Zaken, Jeugd en Zeden Politie, Directie Voogdijraad, Ministerio Publico, Directie Volksgezondheid, Fundacion Respaldo y Sociaal Psychiatrische Dienst (SPD).
Tur servicio lo tuma lugar den un solo edificio, cu tin tur facilidad necesario.
Durante e proyecto piloto lo duna e servicionan di investigacion medico, investigacion forensico y tambe e raportahe, mientras cu ta bay tin un solo entrevista forensico cu e victima.
Lo ofrece tambe terapia, tratamento y guia, cu ta enfoca riba seguridad y recuperacion.
