ORANJESTAD (AAN): E ta un regla basico cu Sistema Hudicial tur pais moderno ta percura pa atene nan mes na dje!
Si un acusado presenta dilanti Huez y e ta acusa di un crimen, y bin haya sa cu e persona tin problemanan mental, e.o. e ta un schizofrenico, automaticamente e no ta haya un castigo pa wordo encarcela den un Prison.
Un hende cu ta sufri di schizofrenia mesora ta converti su mes den un preso/ pashent special. Nan ta wordo encarcela den un lugar special pa rehabilitacion.
Pero na Aruba? E ta djis wordo poni den Prison di KIA, y ora cu e malesa bolbe bin bek na superficie, nan ta djis ponebo den cashot pa varios dia. Siendo cu e scuridad di asina hopi tempo lo bay perhudica e persona aun mas, y envez di yud’e recupera di schizofrenia, e ta empeora tur cos.
Esey ta loke famianan ta reclamando e siman aki di loke ta pasando cu un detenido hoben den Prison di KIA na Aruba. Nan ta convenci cu loke ta ser haci cune ta inhusto.
Famia a splica na DIARIO, cu nunca e hoben aki tabatin problema mental asina. E tabata un persona hopi spierto, atento, y sigur cu yen amor pa bida. Pero sinembargo el a comete un eror, y a haya sentencia y a wordo encarcela na Prison di KIA.
Kizas stress y mas factor a pone cu e hoben su actitud a cambia. Famia ta sigur cu e actitud di Cuidadornan di Preso a ‘prikkel’ e hoben asina hopi te cu el a cuminza mustra cosnan cu a laga famia babuca ora cu nan ta bishite semper riba Dialuna na Prison di KIA.
Diripiente nan yiu no ta corda tur cos mas. E no sa di con diripiente e tin bolombonchi na su braza, of na su pia. Asina a logra di busca forma pa expertonan por check e detenido pa mira kico ta pasando. Di e forma ey nan a bin haya sa, cu e preso ta sufriendo di schizofrenia. Esaki ta un malesa mental caracteriza pa episodionan continuo of cu ta relaps cada biaha di psychosis. Sintomanan principal ta inclui halucinacion, delusion, ta bira paranoico, y pensamento desorganiza, y mucho mas.
Famia no ta keda keto: Ora cu famianan a bin haya sa esey, e tabata un gran sorpresa. Aki mesora nan a cuminza pensa cu e preso lo bay haya e cuido y guia necesario den KIA pa por trata na sali for di e schizofrenia.
Pero nan tabata ekiboca! Loke nan a mira cu nan propio wowo, ta cu algun Cuidador di Preso mas bien a bira super agresivo. Esaki ta socede hasta den nan bista, riba Dialuna ora cu e famia ta bishit’e na Prison.
Basa riba tur esaki, awor famia a bay prensa pa splica pueblo, y tambe adverti demas famianan pa por fabor nan keda den contacto cu esnan encarcela, pasobra awor nan ta mirando cu propio wowo ta cuanto iregularidad ta pasa eyden. Y ningun hende ta preocupa si un preso awor tin malesa, ni mental.
Unico solucion cu a wordo ofreci, tabata pa dune algun inyeccion pa trata na calma e preso di su lapsonan schizofrenico. Pero parce cu e hanguanan aki no tabata bay bon cune, y mas bien tabata haci e preso bira peor. E ora a cambia pa un regimen di pildora, y esakinan si ta parce di ta mihor.
Pero toch, cada siman nan ta bin haya nan yiu cu otro bolombonchi na su curpa, cu ta indicacion cu atrobe Cuidador di Preso a yen’e cu golpi. Siendo cu nan sa cu e tin schizofrenia y cu tin di bin cu un otro acercamento cune, pa asina e keda trankil.
Nan curazon ta haya dolor, ora nan bin tende e preso ta bisa nan cu atrobe el a wordo poni den cashot, unda casi henter dia e ta den un camber scur. Siendo cu un pashent di schizofrenia no por ta den cashot. E por ta cera si, pero den un lugar special y no den lugar su so, ni tampoco den scuridad.
Situacion anterior: E famia a bisa cu na September 2021 caba el a haya e relapse aki, y un biaha mas e Cuidadornan di Preso a bin cu e solucion pa hink’e den cashot. Security parce ta dal e, y tur esaki envez di mehora, envez di bay dilanti, e ta bay atras y ta afect’e mentalmente aun mas.
“Nunca tempo e tabata den libertad y riba caya, e tabata asina,” su mama a indica na DIARIO. “E unico cos cu mi ta manda pidi Director di Prison KIA, y e Cuidadornan di Preso, ta pa busca un tiki mas informacion, y dun’e un mihor trato. Si bo sa con bo ta atende un pashent schizofrenico, bo sa cu e mihor cuido, mas trankil, lo ta un inmenso sosten, y e atencion sigur lo bay dune un yudanza enorme y reduci cualkier crisis flare-up cu e por haya un biaha mas.” Su deseo grandi ta pa Director di KIA encurasha su personal pa nan ta mas informa, y bira aun mas cauteloso cu hendenan special.
Famia sa cu Prison di KIA no tin hopi recurso economico pa por busca un specialista pa duna e preso e cuido necesario pa su salud mental. Nan sa cu na Aruba mes tin un lista di espera largo pa hendenan haya cita pa atende asunto di salud mental na Respaldo. Pero nan ta convenci cu si nan djis hisa benta e preso den cashot, esey ta bay yude cu nada! Al contrario e lo empeora e situacion, y ta yuda nada pa e preso ey haya paz mental bek na termino corto.
Famianan ta compronde cu ora bo comete un crimen, bo tin di sinta bo castigo. Pero den caso di nan yiu, ademas di esey e mester haya rehabilitacion pa minimaliza efectonan schizofrenico. Sinembargo pa hink’e den cashot, y yen’e cu golpi, esey no ta e situacion adecua.
“Mi ta mira cu mi yiu ta sufriendo bastante eyden. Pesey e siman aki atrobe e ta den relapso , y ta den cashot un biaha mas,” e mama a indica na DIARIO. Cuidadornan di Preso a informa e mama, cu su yiu lo keda te dia 11 di Augustus 2022 den cashot.
Esaki ta un situacion inhusto! Un situacion cu no ta cumpli cu ningun derecho humano. Un situacion cu ta viola tur tratado internacional pa cu trato di presonan. Y e famia a cuminza tuma nan pasonan localmente pa notifica tur instancia hudicial, y organizacionnan NGO riba e asunto aki.
Con por bay laga un persona sufriendo di schizofrenia keda asina hopi dia den cashot scur? Te otro siman Diabierna e lo ta bek pafo pa mira solo.
E no ta compronde pakico ta sigui hink’e den un skina sin salida. Y e famia tin temor cu tin mas preso den KIA cu ta pasando den situacion similar. Pesey na ta rogando tur hende cu tin yiu den KIA, pa nan keda mas pendiente di dje.
Di con Cuidadornan tin di yene cu golpi? Siendo cu e preso ta hopi delega y no tin hopi forza. Y pesey 3 Cuidador di Preso tin di atake hunto y dal e? Nan ta haya esey un abuso, y e famia sa di esey pasobra nan a yega di mira esaki socede cu nan mesun wowo, den bista di famia! Un di e biahanan ey tabata pasobra e Cuidador di Preso eroneamente a kere cu e preso ta papiando di dje, siendo cu esey no ta berdad.
Nan no ta kere cu un preso malo lo hisa man pa e Cuidadornan di Preso. Nan conoce nan yiu como un persona hopi educa. Nan ta lamenta cu derechonan humano di nan yiu ta wordo viola flagrantemente den Prison di KIA. Nan ta desea pa e organizacionnan local di Amnesty International, tambe Rainbow Warriors, y demas gruponan tuma nota di loke ta pasando cu un preso schizofrenico cu envez di wordo yuda, mas bien ta wordo pusha den skina sin salida.
