Un tanta y un ruman muher a hiba palabra den Corte
ORANJESTAD (AAN): Desde cu na April 2024, a haci cambionan den e Codigo Penal Nobo, awor victimanan den casonan serio, tin e oportunidad di expresa nan mes den Corte, promer cu Fiscal exigi castigo.
Diabierna mainta, un tanta y un ruman muher di e victima di asesinato cruel, Sergio Maduro, a haya chens di expresa nan sentimento pa Hues tene cuenta cu esaki.
Famia kier castigo maximo: E tanta di e victima, a declara cu desde 24 di December 2023 a cuminsa periodo di tristeza den famia. A dura 4 siman despues di e asesinato prome cu na funeraria, e famia por a mira e curpa.
Ora a yega na funeraria, nan a haya e sorpresa cu no por a mira e curpa, pasobra Recherche a hiba e curpa pa investigacion. Famia a keda sufri. E tanta a bisa Hues cu den Corte a bin scucha cosnan cu famia tabata sospecha cu a pasa.
El a bisa Hues cu na momento cu a scucha di asesinato di Sergio, e ruman muher a bisa “cu ta Jennifer”.
E tanta ta considera ambos sospechoso como psychopata, cu sa bon con pa hunga nan rol. E tanta a bisa Hues cu e sospechoso pareha a presenta na entiero, duna man na tur hende manera nada a pasa. E tanta a expresa cu e hendenan aki ta forma un peliger pa comunidad. El a bisa Hues cu famia kier pa nan haya nan merecido castigo. El a pidi Hues pa duna e castigo maximo pa tur dos. E tanta a finaliza bisando cu ningun hende por a worde masacra di e forma aki.
Despues di un pause, e ruman muher di Sergio tambe a hiba palabra mustrando cu su ruman tabata hopi conoci den comunidad como un persona cu ta gusta yuda otro.
E ruman muher a bisa cu famia ta haya e pareha culpable di asesinato di Sergio. Emociona e ruman a expresa cu na un forma cruel a mata Sergio.
El a bisa cu e ta confia cu Hues lo duna un castigo husto y ta haci husticia na e asesinato di Sergio.
