Segun Ombudsman di Aruba, Jurima Bryson:
ORANJESTAD (AAN): Segun Ombudsman di Aruba, señora Jurima Bryson, un di e problemanan grandi cu a encontra tempo cu Departamento di Ombudsman a cuminsa opera ta e falta di informacion. Hopi ciudadano no sa di nan derecho y ta laga terminonan legal transcuri sin cu nan haci nada cu ne, entre otro bay den bezwaar of beroep contra un departamento di Gobierno.
Den hopi caso, e falta di informacion ta falta di e instancianan di Gobierno mes cu no ta provee suficiente informacion riba nan medionan social. Sinembargo, segun e, mayoria biaha ta falta di Gobierno. Aunke cu tin un website, esaki no ta ful actualisa y tur cos no ta wordo publica.
Señora Bryson a remarca cu hopi biaha nos ta uza e frase cu tur hende mester sa ley pero con por sa e ley si no por haya esaki? Esaki ta complica cos pa hopi hende y ta hacie dificil pa e ciudadano sa kico ta su derechonan. El a expresa cu Departamento di Ombudsman lo bay campaña hopi fuerte cerca e instancianan pa conscientisa nan cu mester ta transparente y duna mas informacion.
Señora Bryson a enfatisa cu derecho di ciudadano pa entrega keho, no ta un derecho pa ataca un instancia. “Nos ta den 2026, y den un estado di derecho manera cu nos ta biba den dje na Aruba, tur hende tin derecho di entrega keho y e ta un momento di reflexion pa instancianan analisa si e ta haciendo bon of tin caminda pa mehora. Pasobra nan tey pa duna servicio”, señora Bryson a enfatisa.
El a menciona cu e departamento ta haya hopi keho riba e area di salud. Ora ta trata di salud, e tin mas prioridad pasobra e ciudadano ta buscando su salud.
El a agrega cu e hecho cu Medische Tuchtraad no ta funcionando pa algun tempo caba pa motibo di falta di miembro, tambe tin nan atencion sperando cu lo bin un solucion pronto pa cu esaki pa asina esnan mas vulnerabel wordo yuda door di e instancia aki. Y tanten cu e proceduranan di e ciudadanonan ta canando den Medisch Tuchtrecht, Departamento di Ombudsman no por trata nan keho.
