Ayudo gratis ta wordo duna
ORANJESTAD (AAN): Fundacion Anti Droga Aruba (FADA) Diaranzon durante un conferencia di prensa a papia riba e topico di salud mental.
Rubiela Toppenberg trahador preventivo a trece dilanti di FADA ta hopi contento di wak e acogida y interes di comunidad di Aruba pa e topico di salud mental.
“Cerca nos a drenta hopi yamada y mensahe, mientras cu nos a haya masha hopi bishita mes di diferente persona cu a tuma e paso pa cuminza busca ayudo pa nan problema di salud mental”.
Mi ta kere cu ta hopi importante pa enfoca riba e hecho cu FADA tey pa yuda y guia pa yega na ayudo profesional, segun Toppenberg, kende a sigui bisa cu e team profesional di FADA ta full equipa pa asina yuda e personanan cu bin busca ayudo.
“Den e ultimo temponan aki nos tin bon cooperacion tambe cu nos otro partnernan manera SVB, Respaldo y FMAA”.
Nos ta den cooperacion cu diferente instancia y esaki ta canando hopi bon y e clientenan cu ta yega cerca nos na FADA ta hopi satisfecho cu e resultado ricibi y cu con lihe e ayudo aki a yega cerca nan, segun e trahador preventivo.
El a sigui bisa cu FADA ta ripara cu den comunidad tin hopi caso di depresion y ansiedad no solamente cerca adultonan, pero tambe cerca hobennan.
Segun Toppenberg hopi biaha ta hobennan ta puntra pa haya informacion tocante ansiedad y tambe tocante depresion.
El a splica cu ta hopi importante pa remarca cu FADA a saca tur nan programanan di informacion pa ofrece na e scolnan entre otro.
“Tur scol a ricibi esaki caba y nos ta en espera di mas reaccion y mas peticion”.
Nos a haya varios caba pero un biaha mas nos ta haci un yamada na tur scol, tur instancia y tur compania cu ta desea di haya ‘voorlichting’ di nos riba salud mental pa no warda hopi pa haci esaki pasobra e schedule ta yena y nos kier brinda e comunidad completo e informacion, segun Toppenberg.
El a indica cu tin diferente topico disponibel caba manera di depresion, ansiedad, bipolar, schizophrenia y nos ta papia tambe riba salud mental y adiccion hunto.
Toppenberg a indica cu ta hopi importante pa pone atencion extra riba e parti di salud mental en combinacion cu adiccion, mirando cu nan dos ta bay man den man cu otro.
“Nos ta hopi contento cu e progreso aki y nos ta hopi sigur cu e ayudo ta wordo duna tambe”, segun e trahador preventivo.
El a sigui bisa cu FADA ta wak un progreso den e area di salud mental y cu e trabaonan ta wordo haci pa cu esaki.
“Nos ta hopi contento y agradecido pa tur loke ta sosode cu esaki”, segun Toppenberg.
.
