Riba Dia Mundial contra uzo di Tabaco
ORANJESTAD (AAN): Diabierna 31 di Mei tabata Dia Mundial Contra Tabaco y den cuadro di esaki Rulienne Arends, Trahado Preventivo na Fundacion Anti Droga Aruba (FADA), durante un rueda di prensa a duna di conoce cu FADA kier a duna extra atencion riba e topico aki.
El a sigui bisa cu mundialmente ta pone hopi enfasis riba e hobennan y ta pidi e companianan grandi y e industria di tabaco pa no propaganda nan pa haci uzo di tabaco y ta relata esaki tambe na locual ta sigaria electronico.
Mundialmente, un promedio di 37 miyon hoben entre 13 cu 15 aña ta cuminsa haci uzo di tabaco. E forma cu nan ta haci uzo di esaki ta pa medio di 'vaping'. Tin hopi mas hoben ta uza 'vape' compara c'un adulto. Na Aruba ta wak cu esey tambe ta e caso, Arends a remarca.
Ta haya sa di muchanan cu fo'i un edad di 7 aña cu ta haci uzo di e productonan aki. Sea nan ta experimenta cu ne, amigonan ta ofrece nan esaki. Pero lamentablemente tin casonan unda cu mayornan mes ta cumpra e productonan aki pa e hobennan.
E añ'aki, 'vape' ta un di e topiconan mas zona na diferente scol na Aruba. Kier scucha di e hobennan kico ta e motivo cu nan ta uza 'vape'. Nan ta indica cu p'e holor dushi y e smaak c'e tin. Na mesun momento mester remarca cu e hobennan no tin informacion completo riba kico precis tin den e producto aki, a indica.
E trahado preventivo di FADA a sigui bisa cu hopi hende no sa, pero 'vape' tambe ta contene nicotina, cu ta bin di tabaco. Nicotina ta conoci pa adiccion, pero tambe ta stroba e adernan pa e fluho di sanger por pasa debidamente.
Ora e hobennan ta haya sa di esaki tin di nan cu no ta wak e importancia.
FADA tambe a lansa un video unda cu ta pone enfasis riba uzo di tabaco, cuanto hende ta muri pa aña mundialmente, malesanan door di e uzo di tabaco y 'vaping'.
Diariamente FADA ta bishita scolnan ya sea pa sigaria y 'vaping'. Tin un robot cu nan ta hiba como demostracion na e muchanan pa mustra precis kico ta pasa cu e pulmon di un persona.
"Pa awe nos kier para keto pa e importancia di e dia aki. Tur esnan cu kier wak nos video, e ta riba nos plataforma social unda cu diferente otro organisacion lo bay comparti esaki pa para keto un rato riba uzo di tabaco, ban papia un tiki mas cu nos hobennan pa loke ta e parti di vaping", Rulienne Arends a declara.
