Rulienne Arends, Trahado Preventivo FADA:
“Stap lo wordo tuma pa no bende cu menornan di 21 aña di edad
Recientemente, Fundacion Anti Droga Aruba, a duna un presentacion basta amplio na Gobierno, tocante e uzo di vaping bao hoben y e charlanan cu FADA ta duna tocante e peligronan cu esaki ta encera.
Rulienne Arends, Trahado Preventivo, a comenta cu FADA a duna hopi hoben charla, y hopi hoben a meld tambe pa loke ta motivacion, mirando cu nan ta experimentando cu vaping.
“Nos tin di bisa cu e tabata un reunion hopi bon, hopi positivo, unda cu FADA tin algun proyecto na caminda, si tur cos ta bon, na aña 2025, un proyecto grandi relata na e tema aki, pero sigur e parti di con accesible e ta. Pa nos muchanan bao di eigenlijk, 21 aña, e ta un preocupacion; no aworaki, pero ya caba pa hopi aña cu FADA ta papiando di e tema aki, ora nos a duna e prome charlanan di vaping ya tabata for di aña 2021 caba, cu nos ta parando keto, bisa cu e ta mucho accesible, e ta hopi facil pa hoben haya, e ta bay bira un problema for di man, y lamentablemente na 2024 nos t’eynan, unda cu t’asina facil pa mucha di cualkier edad hay’e. Nos tin casonan di muchanan bao di diez aña cu ta haci uzo di e producto aki”, Rulienne Arends a relata.
Den e presentacion pa Gobierno a papia di locual ta e ley di tabaco, cu ta 21 aña p’ariba. E ta poni den ley, pero e no ta mes fuerte cu mester ta y mester bin e control, Rulienne Arends a indica. El a agrega cu eynan ta na unda e problema ta sinta.
“Mi tin di bisa cu a ser papia cu ta bay cuminza informa tur lugar cu ta bende e producto aki, pa tene cuenta cu mester tin 21 aña pariba, mester controla ID, pues stapnan a wordo papia, y nos ta spera cu dentro di poco por ehecuta esakinan tambe”, Rulienne Arends, Trahado Preventivo di FADA a duna di conoce.
