ORANJESTAD(AAN) Recientemente Faculty of Hospitality and Tourism Management Studies a tene un open dag, pa e potencial studiantenan nobo y nan mayornan bay tira un bista na Universidad.
Den un entrevista cu DIARIO Decano Sue- Ann Lee a splica cu e idea tabata tambe pa no solamente e personanan cu ta traha den e facultad comparti informacion tocante e estudio, sino tambe studiantenan cu ta haciendo e estudio caba por a conta di nan experiencia.
“Cambionan cu ta bay tin ta cu nos ta ampliando, unda cu pa proximo aña e edificio nobo lo ta cla, pues nos ta bay tin mas espacio pa por facilita nos studiantenan nobo”.
Esaki ta algo hopi positivo, pasobra nos facultadnan ta creciendo y e demanda tey tambe pues pa Turismo y Hospitalidad, segun Lee.
El a sigui bisa cu industria hotelero ta pidiendo pa mas trahador y pesey e facultad ta purba di provee mas cu por.
“Nos ta contento di wak e crecemento den nos facultad, unda cu nos tin casi 40 studiante cu a cuminza cu nos facultad e aña aki”.
Nos ta verwacht cu esey lo keda mescos of te hasta crece mas, si bo wak e demanda cu tin pasobra trabao tin, segun e Decano.
El a splica cu hopi di e hotelnan ta prefera di por contrata un studiante cu a logra su Bachelor’s degree, pasobra e studiante ey mayoria biaha tin cierto nivel di ‘critical thinking’ y ta bon den haci analisis.
