Archivo Nacional Aruba ta invita
ORANJESTAD (AAN): Aña pasa, e fecha 6 di november a wordo decreta pa Gobierno di Aruba, como “Dia Nacional pa Conmemora tur luchador di resistencia nacional y den Reino”.
Relaciona cu e fecha aki, e aña aki na Archivo Nacional Aruba conhuntamente cu Fundacion Amigonan di Archivo ta organisa un actividad pa hoben dia 4 & 5 di november y pa e publico general dia 6 di november proximo. E dianan aki ta brinda e oportunidad di bishita e exposicion di Archivo Nacional Aruba tocante e Segunda Guera Mundial conmemorando e 80 aña di fin di e guera. Inspira pa “Dia Nacional pa Conmemora tur luchador di resistencia nacional y den Reino, dia 6 di november”, un obra teatral lo ser presenta bou direccion di Sr. Charles Croes y su elenco di Creative Art Aruba, titula ‘E ultimo carta’. Inspira pa e ultimo carta cu e hoben Arubiano Boy Ecury a lucha pa e libertad, un luchador di resistencia nacional y den Reino. Boy Ecury brutalmente a wordo fusila dia 6 di november 1944, mas cu 80 aña pasa y ta recorda su lucha.
Pa haci e e proyecto especialmente pa e hobennan posibel, Fundacion Amigonan di Archivo cu e sosten di UNOCA y Het Cultuurfonds Caribische Gebied, a invita 4 scol secundario pa bishita e exposicion y presencia e obra teatral aki. E meta di e proyecto aki ta pa keda inverti den nos hobennan, inverti den enseñansa y pa educa nos hobennan di e historia di Aruba.
Pa e publico en general e presentacion lo ta diahuebs 6 di november pa 7.00 p.m. na Archivo Nacional Aruba, alaves tin oportunidad pa bishita y admira e bunita exposicion di segunda guera mundial cual ta drentando su fase final, prome cu bin un exposicion nobo.
Archivo Nacional Aruba y Fundacion Amigonan di Archivo kier a gradici Creative Art Aruba particularmente Sr. Charles Croes, Sra. Lupita Bernabela y e actornan participando den e obra teatral, UNOCA, Het Cultuurfonds Caribische Gebied, Subway Aruba, Directie Cultuur Aruba, VIA Rentals, Sr. Boy Ecury y e personal di Archivo Nacional Aruba pa nan sosten den e realisacion di e proyecto aki.
