Sharon Meijer di Asuntonan Economico ta splica:
ORANJESTAD (AAN) – Sharon Meijer, consehero di “Foreign Economic Relations” na Departamento di Asuntonan Economico, comercio y Industria, den conferencia di prensa a haci un invitacion di parti di ExproDesk, na tur empresario y comerciante local pa asisti na un siman largo di “Export Week 2022” yama “Conquering New Horizons”. E ta completamente gratis y lo tuma lugar den e Departamento di Economia mes.
E evento aki ta cuminza Dialuna proximo te Diabierna y ta consisti di un siman cu diferente tayer, den cual lo duna diferente informacion tur dia, di 9’or di mainta te 12’or di merdia.
Meijer a indica cu e personanan cu ta atende e siman aki, tres dia of mas, ta termina cu un certificado, e ultimo dia di “Export Week” (Siman di Exportacion).
“Esaki ta pa tur persona cu ta interesa of kier sa mas tocante exportacion of tin un idea cu nan kier crece nan negoshi y kier sa informacion, por ehemplo, riba e ultimo tendencianan di comercio electronico”, señora Meijer a señala.
E siman ta habri dialuna cu temanan mas tradicional manera E-commerce, pero tambe ta bay tin mercadeo digital, marca, entre otro informacionnan cu ta hopi importante.
“Tin ora enberdad bo tin bo website, bo social media, pero con pa crea contenido creativo y con pa atrae bo publico pa bin riba bo website of pa haci conversion via bo website of social media”, Meijer a agrega.
Tambe e siman aki tin temanan manera relacionnan publico, incluyendo “marca personal” (personal branding) y lo sigui durante e siman cu diferente topico mas, manera economia circular y con por haci esaki den bo negoshi, tambe den conexion cu exportacion, pa haci bo compania no solamente mas exitoso, pero tambe con por haya diferente idea nobo di modelo di comercio (business model) , pa haci negoshi aki na Aruba.
“Nos ta sigui tambe cu diferente orado internacional tambe, y mesun dia ey y durante di e siman nos tin diferente ‘E-payments’, pago online pa diferente persona cu kier sa di e futuro di pago digital. Nos ta bay tin desde usando bo credit card via bo website, pa haye riba no mesun cuenta, te esnan cu ta custumbra cu e sistema di ID na Hulanda, manera 'blockchain' y 'Cryptocurrency”, el a splica.
Naturalmente, lo tin “doing business” pa esnan cu ta interesa na con pa drenta e mercado di Merca, Asia, pa ordena y importa cosnan di calidad. Nan ta bay tin tur e informacion aki, y loke semper ta hopi bon pidi ta “doing business” cu region di Caribe y Curacao.
“E aña aki tin e oportunidad unico pa sigui locual nos a cuminza aña pasa den e “Export Week” unda tabata tin tur e informacion tocante ‘blockchain’ y Cryptocurrency”.
E aña aki ta un oportunidad hopi valioso cu ta bay ta completamente gratis pa Aruba su entrepreneurs. Si e participante ta bin cu laptop no solamente e biaha aki e ta bay haya tur informacion tocante kico 'blockchain' y 'cryptocurrency' ta, pero e por crea su propio crypto-wallet, haya su 'cryptocurrency' pa bay cas cune. Pues no solamente ta bay haya informacion pero con pa traha cune, el a remarca.
