Awe ta Dia Internacional di Enfermeria:
ORANJESTAD (AAN)—Relaciona cu e Dia Internacional di Enfermeria, cu ta wordo celebra awe, Diahuebs 12 di Mei, un enfermero di profesion, actualmente pensiona, a conta DIARIO un experiencia cu e mes a pasa den dje hunto cu otro personanan.
Ta asina cu dia 29 di April ultimo, ora e actividad festivo custumbra riba diabierna anochi tabata tumando lugar na Djiespie’s Place, un incidente a sosode. Durante baliamento un persona a bira malo, zak den otro riba vloer te cu el a perde sinti. Mesora boluntarionan a dune prome auxilio pero e no tabata reacciona ora nan tabata papia cune. Nan a pone den posicion riba su banda robes (stabiele zijligging).
Un enfermero cu apenas a caba di yega, para no mucho leu mas of menos un 20 minuut di e sucedido, mirando cu e banda a stop di toca y cu hopi hende a bay aglomera net nan dilanti, el a dirigi su mes den e direccion menciona, unda un conoci a bise pa e core bay wak cu tin un hende a bira malo. Apesar di ta un pensionado, e enfermero a acudi inmediatamente, cumpliendo asina cu su deber moral, profesional y humano. E ora ey el a keda den shock ora el a wak e cara di e pashent ya cu e ta un amigo di tempo e tabata studia na Hulanda na cabamento di aña 70.
E amigo no tabata duna señal di bida. Rapidamente, el a tuma parametro conoci universalmente “A.B.C” cu resultado negativo, y asumiento cu 911 a wordo yama caba, a dicidi pa pidi boluntarionan eynan presente, pa yuda pone e persona plat riba su lomba y cuminza reanime. Asina esaki a sosode, di un forma relampago, manera cay di cielo, un di e tres agentenan policial (motoriza), hopi hoben, sin vacila a bay directamente na e persona y cuminza reanime (hart-massage), dune CPR.
Di mes, e enfermero a tuma e parti di dune oxigeno. Dos ambulance a bin y cinco paramedico a tuma e caso over y traha cune cabalmente y duro, cu tur nan conocemento, uso di mashin sofistica, bon coordinacion, teamwork y a sa, den un tempo relativamente corto, estabiliza e persona y transporte pa hospital.
Apesar di e momentonan di angustia, ta di aplaudi e comportacion y cooperacion. Robert Maduro (cu tambe a yama 911) a yuda hopi den esey, pidiendo pa duna espacio pa e prome boluntarionan por a traha, y caminda liber na e fluho di trafico pasando, na spera di polis y ambulance. E enfermero ta gradici tur cu a yuda, cu a reza un “Nos Tata” pa salud di e persona y e ta yama danki na tur e boluntarionan cu a yude direct y indirectamente, y cu finalmente a scapa bida di e pashent.
Reconocemento:
“Gerencia, staff y personal di Djiespie’s Place ta duna reconocimento y gradicimento, na tur e personanan cu a yuda, duna nan aporte pa scapa bida di un persona cu a bishita e actividad”.
E enfermero a conta tambe cu el a bay bishita e persona aki na Cuido Intensivo, y el a haya un bon gevoel di e trabao cu a wordo haci durante e incidente. E ora ey el a laga su nomber y telefon pa e famia di su amigo yame, y pa e ser conoci cune, door cu nan conoce otro desde cu nan a studia na Hulanda.
Diadomingo siguiente, e enfermero a haya yamada di e yiu muher di su amigo, y a dune danki di curazon, cu el a scapa bida di su tata. El a sinti un emocion enorme y a bisa cu e kier papia cu e famia, y esey a sosode dia 2 di Mei cu tabata un dia liber, unda henter e famia a ricibie. El a ricibi hopi elogio y sentimento pa e sucedido y tambe algo delicado pa e famia.
Hopi cos ta sosode ora un miembro di un famia bira malo. Henter e famia ta envolvi y ta bira malo. Total nan a keda cu e enfermero lo keda den contacto cu nan y si den algo e por yuda, of duna conseho e ta disponible pa esey.
