ORANJESTAD (AAN) – E Head Marketing di Post Aruba, señora Catherine Lacle, a duna DIARIO informacion relaciona cu un invitacion cu nan a haci, Diabierna, na e artistanan cu a diseña e stampianan pa 2021, pa nan topa cu e publico interesa y firma e envelopnan pa esnan cu a cumpra.
Lacle a splica cu tabata tin dos edicion cu tabata contene “First Day Covers” y e dos artistanan cu a diseña e edicionnan aki a wordo invita Diabierna, entre 10 or di mainta pa 12 or di merdia, pa tur cliente cu ta desea pa cumpra nan “First Day Covers di coleccion” por a pasa y topa cu e artistanan y laga nan firma nan envelopnan.
El a menciona cu ademas tabata presente meneer Arthur (Tuy) Giel, cu ta un piscado hopi conoci na Aruba, cu a sali riba un di e stampianan di e emision di Tecnicanan di Piscamento, diseña pa Rhona Lemminga, y tambe tin e emision Agricultura, un serie diseña pa Elvis Tromp.
E evento aki a tuma lugar na Post Aruba Oranjestad, y tabata solamente riba Diabierna, pero tur persona cu kier cumpra un envelop di su emision preferi, por pasa sea na Post Aruba Oranjestad of San Nicolas, Lacle a indica.
Señora Lacle a menciona cu stampia ta hopi educativo, y cada tema tin un historia su tras, cu ta hopi interesante y cu ta algo cu ta di Aruba su cultura, y cu Post Aruba kier mustra pafo, na henter mundo.
