ORANJESTAD (AAN): Biblioteca Nacional Aruba a clausura otro edicion di su proyecto ‘Conta cuenta na Casnan di nos Grandinan’.
E biaha aki e gira tabata cu autornan y contador di storia Irmgard Frans, Robert Reeberg y Astrid Gietel.
Biblioteca Nacional Aruba ta organisa e programa aki tur aña. Durante 3 luna, April, Mei y Juni, hunto cu autor, poeta y contador di storia ta bishita e diferente casnan di grandinan pa presenta un programa di un ora cu storia, poesia, obra teatral y musica y entretenimento. Ta bishita San Pedro Paviljoen, Huize Maris Stella Savaneta, SABA San Nicolas y Cas Marie Savaneta.
Den e di dos parti di e programa, na April, a ofrece musica di Cah’i orgel bou direccion di sr. Nelson Tiel y acompaña pa un bunita baile di pareha Helene y Betto Ruiz. Esaki bou guia di John Freddy Montoya.
Na Mei, den e di dos parti, a presenta un pelicula di Instituto di Cultura tocante utensilionan di antes. Hopi informativo y cu a trece bon recuerdonan cerca nos grandinan.
Na Juni, Grupo Zjilea, bou direccion di Chencho Kelly, a deleita nos grandinan cu musica crioyo. Unda nan a gosa, canta y baila te unda cu por. E clausura a tuma lugar na Cas Marie Savaneta. Tur participante tabata presente y a cera cu musica di Cah’i orgel. Cu un brindis y algun snacks.
Coordinacion di e proyecto ‘Conta Cuenta Na Casnan di Grandinan’ ta den man di bibliotecaria Yosmar Sneek hunto cu e miembronan di e comision, Giselle Lacle, Shuraima Quant y Marlon van der Linde. Ta gradici Quota International Club of Aruba cu ta ofrece un contribucion financiero pa cubri algun gasto. Un danki di curason na tur cu di un of otro forma a contribui na e exito di e programa muy en especial na nos departamento di Media.
Irmgard Frans: Irmgard Frans ta un persona creativo y hopi productivo cu mas cu 10 publicacion riba su nomber. Trahando den su oranan liber y weekend e ta logra hopi. Irmgard Frans hopi aña pasa a tuma e reto pa contribui na produci buki pa mucha na Papiamento.
“Mi mision ta: Pa na un manera artistico, crea storianan di identificacion y inspiracion, pa preserva e cultura di nos weganan di infancia, e goso y alegria di cada un di nos. Mi no ta un hende cu ta sinta warda, mi ta sigui traha. Mi gusta reto, siña y proyecto nobo”. Di un idea ta nace un otro.”
Na 2024 autor y pintor Irmgard Frans a presenta su ultimo publicacion na Biblioteca Nacional Aruba, titula ‘Vietnam den Steenweg’. Sra. Frans ta gusta historia y a documenta e historia di Steenweg pa basta aña pa medio di entrevista cu e personanan cu tabata traha den Steenweg. Sra. Frans a skirbi diferente buki pa mucha y a participa na Festival di Buki pa Mucha diferente biaha.
Astrid Gietel: E ta ex-trahador na Biblioteca y contador di storia. Astrid a baha cu pensioen algun aña pasa pero ainda nos por conta riba Astrid pa ‘Conta cuenta’. Astrid a participa na Festival di buki pa mucha diferente biaha y tin un talento banda di conta storia, pa rima y canta tambe.
Robert Reeberg: Den pasado Robert Reeberg a yuda biblioteca hopi biaha cu actividad pa mucha y tambe a participa como autor na e Festival di Buki pa Mucha. Na diferente ocasion sr. Reeberg a compone y produci e canticanan di e festival. Meneer Robert su hobby faborito ta: skirbi! Y esaki e ta haci riba tres tereno: E ta gusta skirbi storia, e ta gusta skirbi poesia y e ta gusta skirbi cantica. For di chikito caba e tabata gusta skirbi. El a publica 11 buki pa mucha. E aña aki sr. Reeberg a participa den proyecto Conta cuenta.
