Competencia internacional ta crea un exigencia importante na 2023 --- *Upgrading di conocemento den un crisis mundial di e base social --- *Un forsa laboral renoba mester sostene economia y Florin Arubano
ORANJESTAD (AAN) — Den desaroyo di hende, por mira con desaroyo di comunidad, ciencia y tecnologia a conoce desaroyo hustamente pa sirbi hende y su bienestar.
“Obra” y “traha” ta mustra riba e proceso cu ta parti di tur hende na tur nivel. Tur rey, imperador, comerciante, persona cu ta bende nan servicio na un cas comercial of Gobierno, mamanan cu ta cuida nan yiunan, ta trahador.
Ta e planificacion, direccion, ehecucion, responsabilidad mara na cada hende, trabou ta haya su esencia.
Nos bay Ukraine na e momentonan aki, nos ta mira cu e companianan tan importante pa mundo cu ta produci cuminda pa mundo, ta paralisa pasobra e terenonan a wordo destrui y e trahadornan den tur rango, no por haci nan trabou.
Resultado ta, cu rond mundo, hamber ta aumenta.
Nos no mester bay leu for di Ukraine pa mira pakico ehecucion di trabou di hende, ta bira un problema pa mundo.
Putin y su ehercito tambe ta trahador. Pero kico nan trabou ta haci cu mundo, ta ehempel di e realidad di loke labor di hende ta produci pa comunidad, pa mundo.
Tur relato economico, financiero, social cu nos ta lesa pa informa nos lectornan, ta informa cu riba tur tereno, ciudadano como trahador, tin un responsabilidad masha grandi cu Aruba pa e pais por conoce recuperacion.
Nos ta bay cas di tur Arubiano pa na prome lugar bishita e personanan di mas edad, cu tin un trabou enorme pa realisa pa Aruba.
Nan mester utilisa nan tempo pa entrega e poblacion mas hoben, e fundeshi necesario pa bolbe na loke Aruba a laga atras.
Nan mester splica hobennan e balor di uza chapi. Di haci uzo cu tecnologia mas moderno pa produci cuminda pa Aruba cu agricultura y cria. Nos grandinan di awe mester splica con por haci pesca un bon entrada atrobe.
Nos welanan mester sostene trabou den cushina cu preparacion di platonan cu ta alimenta pueblo.
Entrada cu ofishi den man di homber y muher por crea pa e famia y pa no papia mes e papel di famia pa educa muchanan na un forma, cu nan por participa na comunidad for di nan prome pasonan.
Na cas mester cuminsa cu e trabou di educacion, cu ta base di desaroyo y di trabou di un comunidad.
Mucha mester ricibi educacion riba conservacion y bon uzo di loke tin. Mucha mester ta constructor di e futuro nobo y grandinan na forma di wega, por inspira cerca mucha e balor di hende, e balor di trabou honesto.
Mayornan mester traha conhuntamente, den y pafor di cas, pa construi e forsa laboral nobo di futuro, cu no ta depende solamente di loke mester bini di exterior y cu ta cooperativo pa e mundo nobo den cual nos ta aprecia balor di loke demasiado bez ta resulta na dump.
Educacion na cas mester continua den e produccion diario den cual e trahador di awe, den e rango di mas halto te mas abou, cu su actitud positivo mester debolbe trabou su importancia den dignidad di hende.
Ta ora comprende cu no ta cantidad di placa pero e forma cu ta crea placa pa un mundo por funciona na bienestar di tur hende, por traha riba renobacion di mundo di cual Aruba ta depende.
Excelencia den trabou y no produccion di placa facil ta bolbe bira e herment pa futuro pa e pais. Crimen y corrupcion ta trabou sushi, manera awe Aruba y henter mundo ta experencia.
Henter mundo ta na careda pa crea un economia mundial nobo y Aruba lo tin competencia mas grandi den turismo y tur su accionnan.
Pero den e esaki nos ta sostene e punto di bista di Prome Ministro Evelyn Wever-Croes cu e posibilidad mas grandi di recuperacion ta den nos mes.
Cu forsa renoba Aruba mester traha riba bienestar di hende, cu mester di bienestar di e Florin como medio di pago na e pais, pero tambe fundeshi di e bienestar financiero y economia.
Dia di Tranou 2022: tin trabou pa traha pa tur hende. Un momento grandi di Arubianismo ta presenta su mes y ta entrega Aruba un bentaha.
Aruba a marca historia di un Pueblo trahador, luchador. Un Pueblo chikito y simpel pero si respeta!
Awor ban entrega na futuro, e logronan di sudor di frenta di generacionnan di Arubiano, cu a bay nos dilanti.
