ORANJESTAD (AAN): Esey ta e informe mes cu DIARIO a ricibi! E artista internacional di reggae, esta ZiGGi Recado ta lansa proyecto musical nobo aki na Curaçao.
Despues di un periodo di 5 aña, ZiGGi Recado ta lansa su cancion titula “Got my heart”. Un cancion di ‘reggae/dancehall’ cu sigur lo keda gusta pa tur cu ta scucha e genero aki.
Esaki ta prome di 8 cancion cu e artista aki ta preparando pa lansa. Riba Diabierna 7 di October el a lansa e prome di 8 cancion cu e lo estrena tur Diabierna pa 8 siman largo. Cada cancion lo keda compaña pa un ‘visualizer’, dunando tur tema un toke visual extra artistico.
ZiGGi Recado ta naci na 1981 na Rotterdam, y e ta canta-autor y productor di musica, a crece y biba na St. Eustatius for di su prome te cu su 12 aña. Despues el a muda pa Aruba pa atende Colegio Arubano y na 1999 el a regresa pa Hulanda pa continua su estudio na Rotterdam. Debi na su amor pa musica, semper e tabata rondona di personanan musical. Esaki a pone cu den corto tempo el a drenta studio di grabashon y sigui desaroya su mes musicalmente.
Na 2008 el a lansa su album titula “In Transit”, e album aki ta contene e hit mundial “Need to tell you this”, cual ta e tema musical cu a duna ‘ZiGGi Recado’ reconosementu internacional.
Despues cu su carera musical a sigui progresa el a presenta riba diferente esenario di festivalnan grandi manera Sziget (Hungaria), Reggae on the River (California), Lowlands (Hulanda) y Summerjam (Almenia).
Tambe el duna concierto den paisnan manera Portugal, Suecia, Francia, Sudan, Islanan Cabo Verde, Colombia, India y hopi mas. Tur esaki combina cu hitnan manera “Gonna Leave”, “Mary” y “Blessed”, ta prueba cu ZiGGi Recado ta un artista di ‘reggae’ di taya.
Loke ta haci ZiGGi Recado su proyecto nobo asina special, ta cu el a produci, skirbi y graba tur cancion na Curaçao. E grabacionnan pa su 8 ‘visualizers’ tambe a ser graba na Curaçao en colaboracion cu de Castro Studios. Banda di e proyecto aki, DIARIO a compronde cu ZiGGi Recado lo tene su prome concierto na Curaçao den e lunanan venidero. Esaki lo ta un evento unico. Mas detayes lo sigui asina cu fecha y localidad ta confima.
ZiGGi Recado y su tim ta entusiasma pa comparti su proyecto nobo cu pueblo di Curaçao, y ta sumamente gradisido pa tur e inspiracion cu nos bunita isla a brind’e durante di su estadia aki. E ta spera cu su musica lo yega na curazon di un y tur.
