Dr. Wilmer Salazar: --- Biento di Cuaresma, stof di Sahara, turismo
ORANJESTAD (AAN) – Matutino DIARIO a tuma contacto cu Dr. Wilmer Salazar, Consehero Medico di DVG, relaciona cu e problema viral cu a bin ta afectando nos poblacion, vooral muchanan chikito di menos di dos aña of di cinco aña, cu a haya un cuadro pisa cu, den diferente caso a rekeri di hospitalizacion y a wordo diagnostica como “rotavirus”.
Dr. Salazar a señala cu, evidentemente, Aruba a haya su mes den un avalancha di cuadronan no solamente di griep, pero tambe causa pa e biento di Cuaresma, manera e biento di Sahara, cu a trece hopi stof, y a causa casonan di rhinitis alergico, cuadronan viral manera adenovirus cu ta otro tipo di virus respiratorio superior y tambe e episodionan diareico. Otro factor cu dr. Salazar a menciona ta e turistanan cu a bin di diferente pais, entre otro di Merca y cu a bin cu cuadronan di griep y gastrointestinal, y tur esaki a faborece e situacion viral.
“Mester corda tambe cu e lunanan di April y Mei ta conoci como e lunanan di diarea, den e areanan tropical y sub-tropical den Caribe y Latinoamerica.
Anto nos ta bay confronta cu cuadronan gastrointestinal den mucha y adulto cu bastante frecuencia, y mester cuida, evita deshidratacion, entre otro”, dr. Salazar a splica. El a papia tambe di e rotavirus, y por lesa riba esaki den otro articulo.
