ORANJESTAD (AAN): Aña pasa, un publico grandi a bin hunto pa e prome edicion di Celebra Aruba.
Famianan a yega cu nan yiunan, amigonan, y hopi hende a pasa y para simpelmente pa mira kico tabata pasando. Loke cu nan a haña ta un anochi ameno cu musica, encurashamento y comunion.
E aña aki, Celebra Aruba ta bolbe for di dia 23 te 25 di october na YMCA San Nicolas, y ta invita tur hende pa bin atrobe y pa ta parti di algo mas grandi. Lo tin musica live, voluntarionan local, y un mensahe cu ta recorda tur hende cu: tin speransa.
E evento ta organisa pa The River Ministries, bou di liderazgo di Ben y Jacky Kroeske di Hulanda, den colaboracion cu ICA Aruba.
Pa Ben y Jacky, e bishita aki ta pa duna bek y pa mustra bondad den manera pratico.
“Nos a prepara rond di 20.000 euro den donacion pa yuda hende entre otro, paga compras den supermercado, yena auto cu gasolin, cubri huur. Simplemente pa ta un bendicion,” Ben Kroeske a expresa.
Un testimonio special di e evento di aña pasa tabata Yesse, anteriormente conoci como Alaska, kende a wordo invita pa e evento. “Mi sa bo por corda mi di mi pasado, pero e pasado no ta e presente”, Yesse ta declara.
Su storia di cambio y comienso nobo ta refleha loke cu Celebra Aruba kier trece pa hopi hende e aña aki — un oportunidad pa cuminsa di nobo y pa kere den bida atrobe. Bo por lesa e storia di Yesse riba website di Celebra Aruba.
Lo tin transporte gratis cu lo busca hende for di diferente camindanan riba nos isla. Por haya informacion di registracion y orario di bus riba e website tambe.
Bini Celebra Aruba huntu cu nos! Gosa di e musica, tende e mensahe di speransa, y bini cu e speransa pa ricibi cos bon. Dia 23-25 di October na YMCA San Nicolas. Entrada ta gratis.
