Miguel Mansur a expone e nivel di redashi di partido naufraga den Parlamento - Atake di fli di papel cu no por logra haltura, ta sigui confirma berdad - Un berguensa cu hasta kier uza nieta di un gran gobernante den wega sushi
ORANJESTAD(AAN)- E siman aki pa tur hende cu stima Aruba, Arubianonan sincero pero tambe realmente Arubiano paden y pafor, preguntanan grandi ta surgi riba e nivel di oposicion cu ta transforma Aruba den un poz di lodo, cu e moral di Aruba no ta permiti.
Kico a pasa? Prome Ministro Wever-Croes a duna Parlamento tur informacion tocante e personanan cu a bira Ministro na Aruba y asina parti di su Gabinete.
Nan a pasa e test di screening a base di tur informacion cu a wordo duna riba nan persona dor di instancianan oficial, cu no tin nada contra pa nan wordo nombra como Ministro.
Pues informacion oficial di e instancianan oficial cu ta investiga personanan cu kier bira Ministro, a splica cu nan por wordo acepta como Ministro di Aruba, cu ta conta cu sosten cu mayoria den Parlamento.
Kico a sosode? Leynan di Aruba no ta investiga kende ta bira Miembro di Parlamento di Aruba, cu a wordo mancha cu presencia no solamente di acusado pero awor hasta cu persona cu a wordo suspendi di estadia den prison pa detencion preventivo manera Benny Sevinger.
Oposicion, forma pa AVP plus Benny, loke a resta di Accion 21 di Miguel Mansur, y Marisol MAS cas pa Madushi, a dicidi di presenta nan nivel.
Den e proceso aki Miguel Mansur a dicidi di duna un prueba di su nivel extraordinario cu por ta e gran motibo tambe cu su propio hendenan a bira lomba pa su persona loke a haci cu si e move di su asiento, Accion 21 ta deseparece for di Parlamento.
Pa haya algo pa ataca Evelyn Wever-Croes, Ministro Presidente di Aruba, Miguel a dicidi pa lodo, mas sushi cu lodo cu ta wordo produci ora awa topa cu santo.
Miguel Mansur a dicidi di bay uza e nieta di Prome Ministro Evelyn Wever-Croes pa bisa cu e nieta aki ta bishita e school cu tabata parti di investigacionnan di Rocco Tjon, kende a presenta cantidad di documento pa mustra cu Corte no a haya su persona culpabel.
Mucha inocente ta wordo uza dor di oposicion cu no tin arma politico autentico pa enfrenta Evelyn Wever-Croes, Prome Ministro di Aruba, cu pueblo a sostene y a considera como e persona cu por saca Aruba for di e problemanan serio cu no solamente Covid-19 pero tambe e abuso cu Gobierno Mike Eman a haci, a ocasiona.
E reunion cu a wordo yama pa Prome Ministro Evelyn Wever-Croes presenta Ministronan, a wordo uza como ocasion pa oposicion cu ta sostene acusado Benny Sevinger den Parlamento, trata na susha un dama cu un reputacion, cu nan no por mishi cune.
Pasobra awe husticia ta exigi pa mustra, cu no tin mancha na persona di Prome Ministro Evelyn Wever-Croes, un profesional cu a laga su oficina pa traha como Prome Ministro di Aruba.
Su omo a entrega Aruba e Status Aparte cu a habri porta pa hasta traicion den sanger, haya posicion den Gobierno di Aruba.
Oposicion no tin nada cu no ta palabra bashi pa ataca Prome Ministro Evelyn Wever-Croes cu mester mira con e ta cambia rumbo di un Aruba cu a wordo ultraha dor di e casonan bergonzoso di su contrincantenan di AVP, manera Fondo Desaroyo Nobo San Nicolas, abuso cu 1.6 Biyon di Aruba, Debe Nacional cu a keda atras, caso di Paul Croes y permiso, caso di Benny Sevinger Avestruz, caso pendiente di Refineria di Aruba cu Gobierno Mike Eman a laga atras.
Oposicion di Aruba ta busca lodo pa trata na afecta un gobernante di haltura di Evelyn Wever-Croes y ta un berguensa mira con Miguel Mansur ta baha te na e nivel di bay trata na uza school di e nieta di Prome Ministro, pa kere cu e por haci algo.
Loke ta pasa no tin nomber. Pero kico ta nomber ainda? Miguel Man of Miguel Mansur por splica?
E atake di oposicion, cu a cualifica su mes como fli di papel cu no por logra haltura, a duna prueba cu oposicion tin problema pa atende cu un politico di haltura di Evelyn Wever-Croes, cu den un crisis mundial cu a haci cu cantidad di lider mundial mester a bay cas, a wordo eligi dor di Aruba como e lider cu Aruba kier pa hiba Aruba na un futuro di reconstruccion despues cu Evelyn Wever-Croes a hereda un Aruba traiciona y destrui dor di loke Griegonan lo a yama Narcista.
