Den un mundo di cambionan grandi y incertidumbre creciente --- Entrada di Gobierno Arubano no ta depende ni di Pueblo ni di Gobierno --- Honestidad y integridad mester wordo practica den tur gremio responsabel
ORANJESTAD(AAN)- Durante dianan cu a pasa, Hulanda a cuminsa prepara pa despedi di e oficinanan principal di Shell, cu ta bay establece nan mes na Inglatera.
E diferencia den pago cu Shell mester haci na Inglatera y na Hulanda, a conduci na e decision.
Produccion tranca na cantidad di pais, tin economianan di paisnan grandi tranca na un mundo, cu tur bista fiha riba prijsnan cu ta sigui subi y inflacion cu ta keda menasa.
Un di e peligronan mas grandi pa inflacion na un pais, ta iresponsabilidad financiero di Gobierno y aumentonan salarial den gobernacion of den sector priva cu di tur forma e ciudadano mester carga.
Cu Aruba ta den un problema serio, mester ta conoci pa tur ciudadano cu tin wowo y horea y cu por a siguia for di 2020 con mundo a basha abao.
Gremio comercial cu ta e productor di placa na un pais democratico y na paisnan comunista ta wordo reemplasa dor di gobernantenan dictatorial, ta mustra riba e cantidad di problema y incertidumbre pa negoshi internacional.
Produccion ta tranca. Cantidad di mercancia ainda ta pega mescos cu sistemanan cu ta parti esencial di comercio internacional den su funcionamento.
Tur hende ta conciente cu mundo ta den un situacion cu companianan ta cambia di propietario pa por sobrevivi y cu cada dia cu pasa ta trece sorpresa nobo.
Den e situacion aki, un Gobierno responsabel y honesto no por entrega Pueblo fantasia.
Un Gobierno responsabel mester ta sincero cu Pueblo y mester splica Pueblo kico por y kico no por.
Prome Ministro Wever-Croes na 2021 a wordo reeligi pa Pueblo y den encuestanan cu a wordo tene na Aruba, a bini claramente dilanti cu Pueblo di Aruba tabata kier pa Prome Ministro Wever-Croes sigui dirigi Aruba den futuro.
Aruba no a haci esaki pasobra Prome Ministro Wever-Croes ta parti placa, sunchi y brasa.
For di momento cu e prome gobierno di Evelyn Wever-Croes a sinta, e mester tuma medida na un Aruba, cu Hulanda a declara bancarota.
No ta pa motibo di Prome Ministro Wever-Croes Hulanda a bini Aruba na 2014 pa pone Aruba bou supervision, bou curatela politico, for di 2014.
Aruba a sobrevivi situacionnan serio pero Aruba mester enfrenta un futuro di riesgonan grandi.
DIARIO a splica tur loke lo mester inverti den cuadro di cambio di clima, cu ta un responsabilidad enorme cu lo afecta industrianan, manera di auto, cu na 2020 a wordo paralisa dor di Covid-19.
Un mundo mester recupera y si paisnan grandi mes a cuminsa ta bula riba un pia pasobra cana riba dos ta haci dobel dolor, Aruba tambe mester ta cauteloso.
DIARIO tin respet pa e forma cu Prome Ministro Wever-Croes ta atende cu situacionnan pasobra e gobernante no ta priminti nada, cu despues di 2021 e mester kita for di esun cu ricibi pa loco.
Ni Aruba ni otro paisnan na mundo tin fondonan pa sigui pone den instancianan di momento manera Fase, cu no ta e unico motibo cu a baha entrada di personal di Gobierno, cu na 2020 pa basta luna casi no tabata tin entrada y tabata duna comercio placa di prestamo pa asina tur famia por a keda na bida.
Ta tristo loke ta pasa awe na Aruba, caminda un grupo cu tin su interesnan personal, kier exigi Gobierno Wever-Croes, hiba un gobernacion cu lo destrui Aruba.
Honestidad y integridad no solamente mester bini di lidernan politico pero tambe di otro lidernan den comunidad, cu no por practica mentira of crea pensamentonan cu por afecta Aruba.
Lidernan di tur sector ta bon na haltura cu comercio na Aruba ta den problema serio y no tin placa pa aumenta nan gastonan den forma di belasting cu mester subi mas ainda pa asina paga mas placa na trahadornan.
Tin proyectonan pa futuro, durante cual mester paga pa gastonan cu e pandemia a causa pero tambe debenan cu no ta Gobierno Wever-Croes a crea.
Tur Arubiano ta bon na haltura di esaki.
Pa por yama Prome Ministro Evelyn Wever-Croes integro, mester exigi pa e haci loke ta bon pa Aruba sin mira resultado politico.
Den esaki nos ta sostene completamente sigur como medio di comunicacion, e maneho di Gobierno Wever-Croes, manera nos concenshi ta exigi.
Nos, cu como prensa ta na haltura di e desastre cu tin na mundo y cu ainda no ta completamente conoci na Aruba cu no tin hende cu hamber ta muri riba caya!
