Diez aña despues cu Reino a baha Mike Eman for di Fort Zoutman
- Aumento di entrada pa grupo grandi di Arubiano na momento historico
- Democracia cu contenido autentico ora sacrificio bira logro pa tur!
ORANJESTAD (AAN) Na 2009, Aruba a cende un bom destructivo bou su Status Aparte ora Mike Eman a presenta su promesa cu e ta mata e Florin cu eliminacion di BBO sin alternativa.
Si nunca Mike por a deshaci di BBO, loke si el a logra ta, deshaci di e felicidad di Aruba, cu su maneho abusivo di placa di Pueblo, hancra den e creacion di Debe Nacional y tur interes cu generacionnan di Arubianonan ta paga y lo mester sigui paga.
E salida di Mike Eman na 2017 a tuma lugar na un momento di confusion total na Aruba, caminda ni instancianan oficial por a duna un pronostico oficial di economia di Aruba, manera ta socede tur aña.
DIARIO a base di e Ley di Contabilidad cu ta e Ley cu ta dicidi con Gobierno por gasta placa di Pueblo, a guia Aruba den e epoca nobo di recuperacion na man di Gobierno Evelyn Wever-Croes, cu a hereda un Aruba, cu tabata cualifica pa bancarota.
Un gobernacion historico a wordo hiba pa Prome Ministro Evelyn Wever-Croes, cu a bari tur e promesanan falso di Mike Eman (cu a desaparece for di bista di Aruba) for di mesa pa asina cuminsa cu e medidanan cu mester a duna inicio na recuperacion di Aruba, cu hunto cu resto di mundo a wordo sorprendi pa Covid-19.
Gabinete
Evelyn Wever-Croes a actua como lider di un Gobierno cu a guia Aruba den e pandemia pa despues di e pandemia bay urna electoral, caminda diripiente Mike Eman a bolbe presenta como e lider (cu a bay y a bolbe) di AVP.
Fiel na e Ley di Contabilidad, e ley cu ta dicidi con ta maneha placa di Pueblo, Evelyn Wever-Croes a guia Aruba cu a duna inicio na recuperacion ora recesion mundial pa motibo di petroleo, a bati na porta.
Aruba a sobrevivi recesion mundial na man di Evelyn Wever-Croes, e lider cu a marca historia di Aruba y a saca Aruba for di e “min” pa “plus”manera expertonan Hulandes lo bisa, pero cu na Aruba simplemente ta nifica cu Evelyn Wever-Croes a entrega Aruba un futuro nobo a base di moral autentico Arubano mara na metodonan mundial moderno pa resultado positivo di gobernacion.
Awe, na Augustus 2024, 10 aña despues cu Hulanda a baha Mike Eman for di Fort Zoutman pa introduci supervision, Aruba ta modelo di bon gobernacion pa Reino.
E resultado directo ta, cu Aruba ta wordo beneficia, cada grupo na su forma, di un aumento di nan entrada, na momento cu mundo ta pasa den problemanan sumamente serio.
Un gobernacion historico ta haya cumplimento den e Gobierno dirigi pa Prome Ministro Evelyn Wever-Croes, e dirigente di Aruba cu despues di e maneho destructivo financiero di Mike Eman, despues di e pandemia y despues di recesion mundial, ta entrega e Arubiano, un adelanto den condicionnan social di bida.
Na e momento cu Hulanda mester tuma medida cu lo mishi cu Arubianonan tambe y mundo ta pasa den momentonan dificil, e maneho cu a wordo hiba dor di Gobierno Evelyn Wever-Croes ta duna aliento na e Pueblo di Aruba pa sigui cana den un futuro di logro di un Aruba bendiciona!
Awe Gobierno Wever-Croes no solamente ta bisa cu e pais Aruba tin placa. Pero awe e sacrificio di Pueblo ta wordo honra, cu un adelanto financiero pa un grupo importante di Aruba, cu DIARIO den proximo edicionnan di analisis lo presenta.
Kico esaki lo nifica pa henter Aruba? Gobierno Wever-Croes ta aumenta e entrada di un grupo grandi di comunidad cu asina por gasta mas placa loke ta nifica cu mas placa ta drenta circulacion na Aruba pa beneficia un grupo mas grandi ainda di comunidad na forma un directo.
Haci sacrificio pues pa recuperacion di un pais, cu ta permiti placa alcansa Comercio, cu ta haya mas entrada y henter economia pa sirbi e bienestar di e comunidad Arubano.
Aruba awe ta e prueba di bon funcionamento di Gobierno a base di democracia, cu ta exigi pa Pueblo participa den e bienestar total di e pais, sigur na momento cu por ehempel na Hulanda, no tin espacio pa mas persona haya asistencia cu den pasado personanan cu problema social tabata busca.
Mester conclui cu den un mundo di problema serio, na Aruba atrobe Gobierno Wever-Croes ta cende e luz di democracia, e unico forma di gobernacion cu ta exigi sacrificio di Pueblo pero ta entrega tambe beneficio di sacrificio na Pueblo.
