Di crisis financiero pa paralisis economico pa reto di Omicron --- *Covid-19 a destrui e prome presupuesto den balansa na 2020 --- *Un analisis di e reto gubernamental mas grandi den nos historia
ORANJESTAD (AAN) — Na 2017 Evelyn Wever-Croes a huramenta como Prome Ministro di Aruba.
E prome dama cu a acepta e encargo pa dirigi e gobierno ehecutivo di Aruba, cu lo a bira e prome gubernante di Aruba cu lo mester a adapta su mes y rumbo di e pais na un desaster tras di otro.
Na final di November 2021 sigur mester recorda con na November 2017, Evelyn Wever-Croes a asumi su responsabilidad como Prome Ministro di Aruba.
Su entrada den e edificio di gobernacion di Aruba tabata uno cu a marca historia. Un desaster tabata spera su persona den e espacio cu e mester a labora como Presidente di e Conseho di Ministro, cu a wordo laga atras pa Gobierno Mike Eman den estado di destruccion.
Ekipo di Gobierno, cu a wordo cumpra cu placa di Pueblo, a desaparece for di e oficinanan cu a wordo laga atras dor di Gobierno Mike Eman den estado di campo di bataya.
Por papia di un situacion di bataya tambe ora mira e situacion di cifranan cu a splica e estado financiero di Aruba, cu tabata den estado di bancarota, manera Hulanda a splica.
Cu un sonrisa riba su cara, Evelyn Wever-Croes a cuminsa cu su labor y a atende e prome crisis cu el a enfrenta den su estadia den oficinanan di Gobierno.
E situacion cu el a hereda di e gobierno cu a bay cas, a haci cu e mester a actua como un gerente di crisis y na 2018 mester a percura pa un structura financiero di Aruba bira realidad di e pais cu for di 2015 a perde su autonomia financiero y mester haci loke Hulanda exigi pa e haci.
Evelyn Wever-Croes a acepta e reto y na 2020 cu un sonrisa riba su cara, e Ministro di Asuntonan Financiero, Xiomara Maduro, a presenta e prome cifranan di Aruba cu tabata den balansa.
Un logro di Gobierno Wever-Croes, cu no tabata na haltura cu otro reto tabata na caminda pa Aruba, cu hasta a deshaci di su status di rehen di Citgo pa por a sigui cana.
Covid-19 a ataca mundo y Aruba mester a cera su porta.
E realidad di loke tabata biba cerca e Arubiano ora mortonan a cuminsa wordo registra y tur trahador mester a bay cas, tabata wordo splica na DIARIO dor di Arubianonan cu a perde nan fuente di entrada.
Evelyn Wever-Croes a acepta e reto y a yega na un acuerdo cu Hulanda pa haya placa pa Aruba por a sobrevivi e drama historico di lockdown na Aruba, cu a haci cu empresa y trahador mester a haya onderstand di Gobierno pa nan sobrevivi.
Sin placa den caha, pasobra el a ricibi e caha di Gobierno cu un debe nacional desastroso, Evelyn Wever-Croes mester a demostra cu e ta un gerente di crisis.
Aruba a cera 2020 cu ciudadanonan cu cuminda, cu atencion medico cu a continua y tabata prepara pa vacuna.
Aruba a cera 2020 cu e promesa cu na 2021 lo tin recuperacion. Na final di 2020 hasta tabata tin e promesa di entrada di industria nobo pa Aruba.
Di e forma aki Evelyn Wever-Croes a bay eleccion y a gana eleccion y hasta a bira e persona cu a haya mayor cantidad di voto.
A base di resultado di eleccion, den un crisis nacional, Evelyn Wever-Croes a bolbe acepta e encargo di Prome Ministro di Aruba.
Awor ta Omicron tin mundo na careda. Kico esaki lo nifica pa Aruba mientras mundo ta lockdown y cientificonan ainda ta trata na determina kico e malesa lo nifica?
Kico lo pasa cu Aruba mientras inflacion mundial ta menasa a base di prijsnan di petroleo y henter progreso humano a base di e tecnologia ta tranca pa scarcedad di chip?
E siman aki a papia di un proyecto hotelero cu ta continua. E proyecto di Eagle LNG pa gas baha costo di bida na Aruba, ta pendiente. Aruba ta en espera di Quanten.
Turismo ta sigui recupera a pesar di e menasa internacional fuerte.
Bista y confiansa di Aruba ta dirigi riba Evelyn Wever-Croes cu ta topa awe cu e atake di Omicron. E tercer reto grandi di su gobernacion.
Awe OPEC mester dicidi kico ta pasa cu prijs di azeta cu lo dicidi pa prijsnan den turismo.
Nos ta sigui tur informacion for di oficinanan di Gobierno di Aruba, cu nunca lo por lubida e gobernacion excepcional di Evelyn Wever-Croes, cu destino a dicidi cu lo ta un gerente di un crisis pa otro, na e momentonan historico mas dificil cu Aruba a yega di conoce.
Nos conclusion ta keda, despues di a analisa 2017 pa 2021, cu Evelyn Wever-Croes ta e politico cu mas experencia di crisis y asina e persona cu mas experencia pa por atende Omicron.
