Ni economia, ni resultado financiero y social Aruba motibo intervencion
*Awe Parlamento Hulandes ta dicidi si ta trata RAft prome cu eleccion
*Partidonan Hulandes rechasa no por ta yabi pa aventura na Aruba
ORANJESTAD(AAN)— Awe ta bira un dia grandi den historia di Aruba, debi cu e miembronan di Parlamento Hulandes cu ta bay cas despues di eleccion, lo dicidi cual ta e asuntonan cu nan mes lo regla y cual ta e asuntonan cu nan lo entrega na e proximo Gobierno.
Alexandra van Huffelen di D’66 ta uno di e Ministronan cu, manera pa basta dia DIARIO a anuncia, lo no bolbe den Gobierno segun situacion ta indica for di awor. E partido di Raymond Knops tambe ta den problema serio den un situacion di cambio y mas cambio na Hulanda.
Den opinionnan di Pueblo cu ta bini dilanti den sondeonan, ta resalta claramente cu no ta asuntonan di Aruba ta e problema di e pais, pero mas bien e problemanan cu ta resultado di un mal gobernacion di Mark Rutte.
Ya cifranan ta indica cu si na e momentonan aki bini un eleccion, no ta partido di e actual Prome Ministro Hulandes, Mark Rutte, ta resulta ganador.
Partidonan nobo manera DIARIO ya a indica ta duna prueba di lo wordo encarga cu mando di Hulanda, caminda e Pueblo ta expresa su malcontento cu e forma cu Gobiernonan di Mark Rutte a atende cu bienestar di e pais.
Informacionnan cu Gobierno Mark Rutte ta den un problema serio cu votadornan Hulandes, ta bini dilanti den tur sector y di tur grupo di edad.
Durante e ultimo dianan, gruponan di personanan di edad avansa y casnan di cuido cu ta atende cu e necesidadnan di adultonan mayor na Hulanda, a expresa nan mes contra e maneho di e actual Gobierno Mark Rutte.
Ora bay den vecindario di schoolnan por scucha critica severo di e forma con Gobierno Mark Rutte a atende cu futuro di mucha.
Na mes momento, gruponan di empresario a cuminsa vocifera e miedo, cu partidonan kier mishi cu e posibilidad pa hobennan di exterior haci parti di nan estudio na Hulanda, loke segun cierto gruponan comercial. A wordo mustra riba e aporte cu Hulanda ta ricibi di e grupo aki den su crecemento economico.
Cu problema serio ta existi pa mundo politico na Hulanda, ta un realidad y manera DIARIO a adverti su lectornan, Aruba mester confronta e peligro cu Statuut ta wordo abusa door di un of otro persona of grupo.
Uno di e puntonan cu DIARIO a trece dilanti ta, cu Hulanda awor kier introduci un RAft contra Gobierno di Aruba, cu a scapa Aruba di a zink.
E RAft aki, cu ta laga e maneho financiero di e pais den man di Hulanda, ta keda un instrumento cu Reino por uza na momento por ehempel, cu Gobierno Eman a zink situacion financiero di Aruba.
Sinembargo, e tempo a impone supervision cu ainda ta presente na Aruba, caminda e instituto di supervision cu ta Caft, mes ta mustra riba e bon trabou cu e Gobierno actual di Aruba a haci pa mehora e situacion financiero di Aruba.
Pues CAft mes ta bisa cu Aruba ta tene su mes na regla, loke ta nifica cu awor no por condena Gobierno di Aruba, cu ta haci un bon trabou.
DIARIO ta basa su mes riba esencia di leynan, cu ta haci inaceptabel pa partidonan politico Hulandes forsa un cambio den e supervision financiero permiti den casonan cu e pais ta na peliger segun Statuut.
Na e momentonan aki Aruba ta ehempel pa paisnan den Reino y pa Hulanda mes tambe, manera DIARIO a mustra.
Pa colmo introduccion di RAft na Curacao a percura pa mas problema financiero na e pais mientras Aruba ta den un situacion stabil cu ta causa reconocimento den Reino y na mundo pa e maneho cu a wordo hiba pa Prome Ministro Evelyn Wever-Croes.
Ley ta bisa cu na momento cu yama eleccion y e gobierno cu ta sinta bay cas, e no por atende asuntonan pendiente a menos cu nan ta urgente.
Cual ta urgente ta e pregunta cu awe Gobierno di Reino Hulandes mester contesta ora e reuni pasobra den e situacion financiero, economico y social ehemplar pa Reino den cual Gobierno Wever-Croes a transforma Aruba, no tin peliger cu prome cu otro Gobierno sinta, Aruba ta wordo declara bancarota, manera e tabata na man di Gobierno Mike Eman!
DIARIO ta pendiente e reunion di awe pa informa su lectornan, ya cu aki no ta trata interes di un grupo of partido pero interes di Aruba y tur Arubiano.
Expertonan cu ta sostene e trabou di DIARIO ta acorda cu Evelyn Wever-Croes a haci pa Aruba loke Mark Rutte no por a haci pa Hulanda ni Reino!
