Celebracion 18 di Maart 2025 ta honra logro di Peticion 18 Maart 1948
- Dignidad di Aruba a wordo restablece na momento crucial den Reino
- E Aruba humilia na 2014 ta entrega prueba di por ta doño di su destino
ORANJESTAD (AAN): Na caminda pa celebracion di 40 aña Status Aparte na momento cu 1985 yega na su fin, historia ta entrega prueba cu e anhelo autentico di e Pueblo di Aruba pa ta doño di su propio destino, nunca a muri. pero a bira lucha di Betico Croes, cu a logra e Status Aparte di Aruba den Reino, cu awe ta honra Aruba como partner igual, despues cu Gobierno Evelyn Wever-Croes a entrega na Reino Hulandes e prueba, cu Arubianonan mes ta capaz pa dirigi y logra un bon futuro pa Aruba.
Celebracion di 18 di Maart, a nace for di e momento cu Betico Croes kier a duna reconocemento oficial di e deseo Arubano pa Aruba ta doño di su propio cas y su propio destino.
Dia 18 di Maart 1948, Aruba den persona di Shon A Eman, a entrega na Reino su peticion pa separa legalmente di Antia Hulandes y keda directamente bou Hulanda.
Betico Croes a bay mas leu cu e separacion solicita na 1948.
Status Apart pa Aruba den Reino, den cual Aruba lo a haya dignidad di pais cu su propio Gobierno di su propio Pueblo, como parti di e union di Reino Hulandes, tabata loke e lucha di Betico Croes a encera binti aña despues cu e deseo di Pueblo di Aruba a wordo traiciona na 1950 dor di dirigentenan politico di AVP.
Na 1950 AVP a trapa riba e mandato di Pueblo di Aruba na 1948, cu Shon A mes a entrega Reino. Asina AVP a traiciona e encargo di tur cu a entrega nan firma pa un status separa di Aruba den Reino.
Esaki pues a bira e motibo directo cu Aruba a conoce nacemento di partido PPA di Fichi Croes, cu no por a acepta e traicion di AVP y a bini cu su propio partido na un momento cu AVP a practicamente stop di existi pa Pueblo di Aruba.
Ora Betico Croes kier a bira lider di AVP cera porta pa e hoben di Santa Cruz y esaki a bira e momento cu Betico Croes a cuminsa lucha pa Status Aparte den su partido nobo cu a bira MEP.
Tabata partido MEP y no AVP, cu a realiza un ampliacion di e contenido di peticion di Separacion y e ampliacion aki a bira Status Aparte, un Aruba cu gobernacion propio den Reino Hulandes.
E mandato di 18 di Maart, a wordo traiciona na 1950 cu Interim Regeling ora AVP a entrega Aruba na “Nederlandse Antillen”.
Dia 12 di Maart 1983, Betico Croes a logra Status Aparte entrante 1986 cu ta exigi e responsabilidad di un bon maneho di e pais.
Na 1985 mester papia di ladronicia di e lucha di MEP y di Betico Croes ora AVP a presenta su mes na un generacion nobo di Arubiano cu no tabata conoci cu e traicion cu AVP a comete.
Mentira y salida di Lago, a wordo uza dor di AVP cu a logra haya gobernacion y a hipoteca e suelo di Aruba.
Na 2009 Mike Eman por a uza e situacion financiero mundial, marca pa un recesion economico, pa bolter e opinion politico di Aruba pa el a haya mando di Aruba, cu el a destrui di tal forma, cu Reino mester a haci uzo di Statuut y pone Mike Eman y Aruba bou supervision di Reino Hulandes.
Husticia semper ta prevalece na mundo. Awe Reino Hulandes ta aplaudi e persona di Evelyn Wever-Croes cu como dirigente nobo di MEP, a hisa e bandera di Aruba cu su omo Betico Croes a introduci pa ricibi respet di Reino pa Aruba cu a soluciona e problemanan financiero cu Mike Eman a laga atras como herencia di su gobernacion.
Asina na 2025, na caminda pa 40 aña Status Aparte, Evelyn Wever-Croes a bolter e imagen cu Mike Eman a crea di Aruba cu Mike Eman kier a transforma como mendigo den Reino.
Awe, na 2025 Aruba ta aprecia su Prome Ministro saliente Evelyn Wever-Croes ricibiendo aplauso den Reino y den mundo.
Kico futuro lo trece pa Aruba despues di e recuperacion di Evelyn Wever-Croes no ta conoci. Pero mester respeta democracia, cu na 1986 a permiti pa derota di tata di Status Aparte.
Na 1986 Betico Croes a muri y a laga Aruba den man di AVP, cu awe atrobe ta bolbe na mando despues cu Evelyn Wever-Croes a deshaci di e forma cu Mike Eman a destrui Aruba.
Ta keda na historia pa sigui skirbi porvenir di Aruba. Awor Mike Eman mester percura paga e debe cu su mal gobernacion di ayera, a laga atras.
DIARIO ta keda pendiente pa informa su lectornan paso a paso.
Mientrastanto aplauso di Reino pa Evelyn Wever-Croes ta resona y ta sostene e bandera di Aruba cu Betico Croes a introduci pa por bula ora bou tono di Himno di Aruba, celebra realizacion di e deseo di firmanan di Arubianonan cu dia 18 di Maart 1948, a wordo entrega na Gobierno di Reino Hulandes door di e dirigente di AVP!
