Caribbean Life Style a entrega otro prueba di bon gobernacion
- Heredera di un cas destrui a construi baluarte pa futuro
- E importancia di stabilidad den creacion di base economico
ORANJESTAD (AAN)- Prome Ministro Evelyn Wever-Croes na un momento sumamente importante a bolbe pone Aruba den e luz positivo mundial.
Caribbean Lifestyle cu ta un programa di renombre, a dicidi di presenta e diez islanan cu mas stabilidad politico den e region di Caribe.
Kico esaki ta nifica pa Aruba ta algo sumamente importante pa analisa na momento e momentonan special aki.
Mundo na 2023 den un recesion internacional ta wordo continuamente confronta cu mal noticia.
Den e temporada cu paisnan chikito manera Aruba mester lucha pa sigui cana den futuro, e programa a presenta Aruba como pais cu mas stabilidad den e region.
Den mundo comercial internacional, e programa aki sigur ta impactante y ta bisa hende pero tambe instancianan y companianan internacional cu Aruba ta un bon decision si nan ta busca un destinacion turistico, un lugar pa haci negoshi of un lugar pa por ehempel personanan cu a retira di trabou, crea un segundo hogar.
Na momento cu Aruba a wordo eligi como na e prome lugar den Caribe y e cuarto lugar na nivel mundial pa su stabilidad, un comerciante cu kier haci un bon inversion ta dicidi pa Aruba si e mester haci un escogencia.
Companianan mester haci un estudio importante di factibilidad di nan inversionnan sea pa negoshi cualkier otro tipo di proyecto y den esaki e trankilidad cu nan por topa cune, sigur ta importante.
Trankilidad laboral, social y un ambiente cu ta inspira tur loke ta positivo sigur ta haya atencion.
2023 mester a bira un aña di recesion y di caida pues comercial cu tur su resultadonan pa un pais.
Aruba di su parti ta sigui crece y ta sigui entrega na mundo notanan positivo.
E informacion aki pues no ta solamente un bon noticia pa un partido of un gobernante pero ta duna refleho di e realidad, cu Aruba cu un bon maneho y cu e hendenan cu ta inspira confiansa den tur gremio di e pais y sigur den gobernacion, merece di haya e confiansa di bishitantenan y personanan cu ta busca trankilidad pa nan prospera den un mundo, yena cu guera y problema.
Sin duda e tipo di publicacionnan aki ta anima esfuersonan pa Aruba sigui cana den e bon direccion y hunto busca perspectivanan pa Aruba sigui crece pa entrega e generacionnan nobo perspectivanan alentador pa nan tambe por sigui cana!
