Kathy Paskel, directora di DIMAS ta reitera:
ORANJESTAD (AAN)-- Matutino DIARIO a entrevista Kathy Paskel, directora di DIMAS, ken a repasa e proyecto “Hunto pa Progreso” dirigi na personanan imigrante, cual a consisti di cuater fase.
E prome fase a abarca e personanan cu tabata tin dunador di trabao y cu a yega Aruba prome cu 1 di Juli 2025, na un manera legal, via aeropuerto, y a draai tambe esun di famia y estudio cu tabata e fase 2, e flex cu tabata esun pa personanan cu tin mas di cinco aña na Aruba, cual ta e fase 3, y 4 tabata e permiso of brug, cu tabata pa personanan cu a yega Aruba prome cu juli 2025 y cu na e momento ey, no tabata tin dunador di trabao.
Esaki ta e cuadro cu cual DIMAS a traha cu ne, y na fin di aña, ora cu e aña a bolter, Minister tambe a anuncia cu e pasonan 1 y 2 a caba mientras cu 2 y 3 ta sigui vigente, y den esey el a referi na kico lo sosode cu e personanan cu a drenta Aruba di manera iregular, por ehemplo via boto chikito.
“Nan ta personanan cu a haya oportunidad di abandona Aruba, y bay nan pais bek, y for di eynan por bolbe solicita y si eventualmente tin un vacante na Aruba y ta pas dentro di e scop nobo di e maneho stipula.
Kico ta scope nobo? Scop nobo ta cu ainda e scop riba e permiso a keda vigente pa 2026, pero tabata tin asina un lista di profesionnan y/of estudionan cu ta duna excepcion riba e parti di scop di e prome permiso pero e ta cu e compromiso tambe cu bo ta bin for di exterior”, Paskel a splica.
El a sigui bisa cu e parti aki ta hopi importante, pasobra su persona cu ta esun cu ta firma permiso, ta wak diariamente cu e tin cu firma pa hendenan cu ta califica cu ta bin di afo, pero tambe di Aruba, y no solamente esnan cu a drenta via barco, pero cu despues di 1 di juli 2025, a scoge pa bin Aruba como turista, y a keda.
“Dus, nan lo califica si nan ta den exterior y bin Aruba cu nan rekisitonan y pidi nan permiso. E ta un transicion, y tin biaha hendenan no ta compronde, y nos mester keda ripiti. E ta un condicion cu lo bo por haya permiso pero mester ta den exterior y bin Aruba na e momento eynan si bo ta cualifica pa trabao”, director di DIMAS, Kathy Paskel a reitera.
