ORANJESTAD(AAN)—Tempo cu ta Reynan y Emperadornan tabata dicidi kico ta pasa cu un ciudadano,
henter Pueblo tabata cera nan boca pa asina un grupo cu pa herencia familiar ta na cabes di Pueblo, haci loke nan kier.
Awe Aruba tin un Rey, pero e Rey ta mara na un Constitucion cu ta bisa cu a base di democracia, gobernacion di e combinacion di Rey y Gobierno di Pueblo ta tuma luga.
Leynan di Aruba ta wordo firma dor di e Gobierno cu Pueblo ta eligi, cu aprobacion di Parlamento, y dor di Gobernador como Representante di Rey.
Cu democracia ta nifica cu un pais ta wordo dirigi dor di un “Gobierno di Pueblo”, mayoria di hende a yega di tende aunke den historia di Aruba e no a wordo respeta, manera e hecho cu Betico Croes no por a bira lider di AVP pa motibo di su nomber, ta duna prueba.
Un Gobierno di Pueblo no ta mara na un clan ni bienestar di un grupito y pa esaki ta realidad, actualmente pa un hende bira Ministro di Aruba e ta wordo gescreen.
E Ley di Screening, mescos cu tur otro ley di Aruba ta e base di firmesa di democracia, pasobra ta Ley ta dicidi kico ta pasa na Aruba y con bienestar di tur ciudadano ta wordo garantisa.
Aruba ta un Estado di Derecho, un pais goberna pa e “Rule of Law”, cu ta dicidi con ta tene eleccion limpi, con Pueblo ta scoge su representantenan cu ta bira Miembro di Parlamento, cu ta dicidi kende lo ta encarga cu e tareanan ehucutivo pa dirigi un pais den e Conseho di Ministro.
Esaki ta nifica cu loke ta pasa actualmente na Aruba, caminda un scandal ta rementa tras di otro, ta un berguensa pero tambe un atentado mortal contra democracia, pasobra ta Ley ta wordo kibra.
Holor di corupcion ta mishi directamente cu e motibo cu tin eleccion na e pais, caminda Pueblo ta dicidi na urna electoral kende lo ta su representante cu mester vigila kico e Conseho di Ministro cu Parlamento ta nombra, ta haci cu e pais.
Loke ta pasa awe na Aruba ta un berguensa pa loke kier considera un Estado di Derecho, cu sucesonan actual ta destrui.
Na un Estado di Derecho, Ley ta dicidi kende ta haya permiso pa establece nan mes na Aruba. Na momento cu tin gobernante cui Husticia a castiga pa manipulacion cu e leynan aki, e sistema democratico di e pais ta enfermo!
Na e momento, cu den porta di eleccion, detencionnan ta cay y tin hende ya den “voorarrest”, pasobra a viola e leynan cu ta atende cu ta entrega tereno di Pueblo pa hende sin entrada biba of pa un empresa cu ta produci entrada, e pais no por papia di democracia pero di abuso di e sistema democratico di e pais.
Ayera mas caso entorno e investigacionnan cu a resulta den e Rapport Refineria di Aruba, a bini den publicicidad. Esaki ta base pa bay investiga si gobierno anterior a pone Pueblo baila pa loke ta parce un poz di corupcion den cual a priminti Aruba cu Citgo lo trece un bienestar desconoci pa Pueblo, mientras awor mester studia si Gobierno anterior a haci su mes culpabel di kiebra di nos leynan ora el a bini cu pa colmo un grupo cu Husticia internacional tabata busca.
Aruba ta prepara pa bay urna electoral caminda nos a yega asina leu cu tanto AVP como POR ta lansa sospechosonan pa bay representa Pueblo.
Un historia di berguensa a wordo skirbi pa Aruba na caminda pa eleccion. Con serio e asunto aki ta, nos lo sigui splica Pueblo pasobra pa restaura nos Estado di Derecho, nos mester bolbe na e prome derecho.
Pueblo mester wordo bon informa dor di Gobierno y hamas un gobierno por ciega Pueblo manera a pasa entre 2009 y 2017 ora cu promesanan falso, actonan contra ley manera rapportnan ta indica, politiconan di gobierno anterior a uza Pueblo pa nan haya voto!
