ORANJESTAD (AAN): Robby Rosel, Vocero di Bureau City Inspector a referi na e casonan di sushedad cu ta wordo mira den hopi bario.
El a bisa cu esakinan tin di haber cu e barinan di sushi cu ta yena of cu e fecha di pikimento a cambia.
El a indica cu e ta kere cu pa esaki mester avisa na e comunidad pa no saca e barinan di sushi afo. Hopi hende ta mantene nan bari di sushi paden, den cura of pone den un hoki caminda cu pa dialuna mainta, ora nan pasa busca e bari di sushi, ya pa un anochi prome ta pon'e cant'i caminda pa asina e por wordo transporta y hiba.
Rosel a agrega cu hopi biaha ta haya cantidad di sushi cu ta wordo yena di mas den e bari di sushi. Tambe ta haya saconan di sushi na banda extra, cachonan ta kibra e saconan y tur e sushedad aki ta bula bay cay den mondi of ariba caminda.
Den e area di San Nicolas, Sero Colorado, Essoville, ta haya esakinan tambe. Na Sero Colorado e buriconan ta coy e barinan y bolternan. Si Serlimar of Ecotech a cambia e fechanan di recogemento di sushi, automaticamente nan ta bolter esakinan, a bisa.
Segun Rosel, na Santa Cruz, Playa, Noord, e area hotelero ta locual ta hopi dolor di cabes den e ultimo dianan. E area hotelero, nan tin bakinan grandi di 'heavy duty' pa nan por tira e sushedad aden. Barinan ta bay over y ta bira yen di sushi.
Den su opinion, ora cu e barinan aki yena, cu e comerciantenan aki ta wak cu e barinan aki ta yen, esnan mes cu ta deposita e sushi, por yama Serlimar, Ecotech of e compania encarga pa pasa busca e sushedad, pa asina por sigui uza e baki y contribui na mantene Aruba limpi, e PR di BCI a duna di conoce.
