DUO lo ta di bishita na Aruba
ORANJESTAD (AAN): Na november, tur persona cu debe di estudio na DUO lo ricibi un mensahe tocante e suma mensual cu nan lo mester paga na 2026. Pa algun, e suma aki por ta menos si nan informa DUO di nan entrada.
No tur hende ta na haltura di esaki. Pa e motibo aki, DUO lo bin Bonaire for di dia 17 te cu 21 di november, Aruba for di dia 24 di november te cu 5 di december y Sint Maarten for di dia 8 te cu 12 di december. DUO lo habri oficinanan di servicio temporal y lo duna informacion. Na Curaçao, e oficina di servicio lo ta habri pa un periodo mas largo.
Indica entrada: Algun ex-studiante ta pagando back mas cu necesario. Nan entrada hopi biaha no ta conta ainda den e calculacion. Esun cu duna su informacion, hopi biaha por ricibi un suma mensual mas abou. Tin biaha e no tin cu paga nada mes.
Monique Hoogerwerf (coordinadora di Caribe) ta agrega: "Nos ta mira cu mas cu mitar di e personanan cu duna informacion di nan entrada no tin cu paga nada despues. Esaki ta duna nan mas espacio financiero pa otro cos y nan ta haya menos stress".
Mayoria biaha bo mes por indica esaki: Pa un gran parti di ex-studiante di Caribe Hulandes y Curaçao, DUO ta ricibi informacion di entrada di Servicio di Impuesto. Pero na momento di busca e informacionnan aki, hopi biaha ainda e no ta disponibel ainda.
Den e casonan ey, ta importante pa e personanan mes duna informacion di nan entrada. Na Aruba y Sint Maarten, DUO no por pidi entrada na Servicio di Impuesto y e ex-studiantenan semper mester informa nan mes di nan entrada.
Informacion pa pagado y futuro studiante: Na Aruba, DUO ta organiza un encuentro informativo pa ex-studiante cu un debe di estudio. Ademas, DUO ta duna informacion, den colaboracion cu Universidadnan Hulandes, na Aruba, Bonaire, Curaçao, Sint Maarten, Saba y Sint Eustatius pa studiante cu tin plan di studia na Hulanda.
Tambe varios studiante Caribense cu ya ta biba na Hulanda caba lo comparti nan experiencia. Asina futuro studiante y nan mayornan ta haya un bon impresion di loke studia na Hulanda ta implica y ki preparacion ta necesario pa un bon comienso.
Oficinanan di servicio temporal: Esun cu mester di yudansa pa aplica pa un reduccion di suma mensual, por tuma contacto cu e oficinanan di servicio temporal cu DUO ta habri na Bonaire, Aruba y Sint MAarten. Esaki ta rekeri un declaracion di entrada di Servicio di Impuesto di 2023 of 2024.
E personal tambe ta para cla pa otro pregunta tocante pago di debe di estudio of ofrecemento di yudansa cu retraso di pago. Studiantenan y nan mayornan tambe ta bonbini cu nan propio preguntanan.
Mas informacion tocante e oficinanan di servicio y e encuentronan informativo ta disponibel riba duo.nl/bezoekcariben.
