ORANJESTAD (AAN): Un otro noticia cu pa habri e siman aki ta esun cu ta menciona cu e Merca a anuncia dialuna cu lo elimina e restriccionnan di ingreso na e pais pa e pandemia na tur esnan cu ta vacuna y cu ta wordo someti na pruebanan y 'contact tracing'.
E representante di e gobierno di Biden, encarga cu e tema di Covid, Jeffrey Zients a bisa cu e medida aki lo drenta na vigor na inicio di November proximo.
Awor, e gobierno di Biden ta bay exigi na tur viaheronan internacional cu ta yega Merca pa ta vacuna completamente y pa somete na e prueba di Covid-19 den virtud di un sistema nobo cu lo permiti e viahenan den avion na e ciudadanonan stranhero vacuna di docenanan di pais pa prome biaha desde e prome dianan d e pandemia.
Entrante principio di November, ciudadanonan stranhero lo por bula pa Merca si nan ta totalmente vacuna y por presenta un prueba di vacunacion valido antes di aborda un vuelo cu destino Merca, asina a bisa e coordinador di Covid di Cas Blanco, Jeffrey Zients.
E flexibilisacion di e restriccionnan di viahe imponi durante e gobierno di Donald Trump, 18 luna pasa, ora cu e pandemia a inicia, ta marca un cambio significativo di parti di Biden y ta responde na un demanda importante di e aliadonan europeo.
E fronteranan di Merca tabata cera pa miyones di viaheronan internacional, incluso esnan vacuna, desde Maart 2020, locual a causa situacionnan personal y familiar hopi doloroso, ademas di hopi impaciencia entre e europeonan.
Union Europeo a anuncia dia 30 di Augustus e regreso di e restriccionnan na e viahenan no esencial den nan teritorio for di Merca, aunke a laga e estadonan miembro e posibilidad di kita e prohibicion pa e personanan totalmente vacuna.
E rekisito aki lo alivia e restriccionnan di viahe cu tabata limita e entrada na Merca na hopi caso pa esnan cu no ta ciudadano cu a bishita recientemente 33 pais, inclui hopi nacion europeo y Reino Uni, independientemente di e estado di vacunacion. Pero pa e viahero pafo di e paisnan aki, e sistema nobo lo impone rekisitonan mas estricto cu lo por ta un barera pa esnan cu ta biba na paisnan unda tin scarcedad di vacunanan.
Merca tambe lo implementa rekisitonan adicional. E ciudadanonan stranhero lo mester somete na e test di Covid tres dia prome cu nan viahe pa Merca y mustra un prueba negativo, y e mericanonan no vacunado lo tin cu somete na e test un dia antes di nan viahe y mester bolbe hacie despues di nan yegada.
CDC tambe lo exigi na e companianan aereo pa recolecta informacion relaciona cu cada viahero cu tin Merca como destino, inclui nan number di telefon y email, pa yuda e funcionarionan di salud publico haci e 'contact tracing' of localisacion di contactonan.
Aunke ainda no tin ningun rekisito di vacunacion pa e viahenan aereo nacional, Zients a bisa cu no por descarta esey.
Zients no a laga sa precis cual vacunanan ta califica pa drenta Merca pero a bisa cu CDC lo duna mas detaye.
E maneho nobo aki ta aplica solamente pa e viahenan aereo y no na e frontera terestre, cual a wordo cera pa e viahenan no esencial entre Canada y Mexico.
